Il 2016 è stada l'ultima festa da musica dal district III (Grischun central, Plaun, Plessur, Mesauc, Calanca) a Lai. Lura ha la pandemia da corona franà festivitads pli grondas. Quest onn, il 2025, ha la Musica instrumentala Salouf Mon Stierva gì la curascha d'organisar in'ulteriura festa da musica.
Era RTR è puspè da la partida cura che societads da musica fan festa. RTR filmescha las producziuns en la halla da gimnastica ed uschia ha mintga societad ed era l'entira populaziun la pussaivladad da guardar ils videos sin PlayRTR/musica ed era sin Playfestas, la plattafurma da festas da chant e musica.
Il radio RTR è live sin la plazza da festa. Il moderatur Sergio Guetg beneventa vus en ses bus d'emissiun gist sper la plazza da festa.
Novas unifurmas
L’occurrenza ha ina clera finamira: la finanziaziun da novas unifurmas. L'unifurma actuala da l’uniun da musica è en il fratemp 27 onns veglia. Il budget per la nova vestgadira importa var 110'000 francs. Quai duess vegnir finanzià cun las taxas da participaziun, cun sponsurs, cun donaziuns e cun il gudogn da la festa da musica sezza. Corsin Demarmels ch'è commember da la Musica instrumentala Salouf Mon Stierva ed era president dal comité d’organisaziun di, che l'idea per la festa saja naschida avant dus onns – ensemen cun la decisiun da cumprar novas uniformas.
L'unifurma custa radund 2'200 francs per commember u commembra, inclusivamain ina reserva per adattaziuns futuras. Davart la nova unifurma na vul l'uniun dentant anc betg tradir memia bler. Mo tant: il tachel da colur caracteristic – fin ussa tar la cravatta u sin las soccas – duess era restar tar la nova unifurma. La preschentaziun uffiziala è la saira dals 14 da zercladur a las 20:30 a chaschun dal concert da la Musica instrumentala Salouf Mon Stierva.
Blera lavur d'organisar
L'organisaziun da la festa ha cumenzà avant dus onns. Ina sfida è la situaziun da spazi a Salouf. La scola cun sia pitschna sala serva sco local da concert. In marsch en il senn classic na datti betg uschia ch’ins haja chattà soluziuns creativas, ha ditg Demarmels. Duas stallas vidas servan sco locals d'emprova – e sin la plazza da scola stat la tenda da festa cun plazza per var 1'000 persunas.
Senza voluntarias e voluntaris na vai betg
Circa 150 gidantras e gidanters voluntaris vegnan ad esser en acziun. Per l'alimentaziun procuran dus teams da gastronomia cun commembers l’uniun da musica e voluntarias e voluntaris. L'ustaria da festa pudess daventar logisticamain ina sfida, surtut perquai ch’il consum da spaisas e bavrondas saja grev da calcular, accentuescha Demarmels.
Program da musica variont
Musicalmain porscha la festa in program multifar. La Musica instrumentala Salouf Mon Stierva sezza na sa participescha betg a la concurrenza cun experts, ella sa concentrescha sin ses concert da la saira. Ina sfida supplementara saja che blers commembers da l'uniun gidian per part ora en autras uniuns da musica.
In'uniun da musica plitost giuvna
Cun var 40 commembers e commembras è la Musica instrumentala Salouf Mon Stierva ina giuvna – la vegliadetgna da musicantas e musicants va da 13 fin 52 onns. Mo il dirigent Stefan Demarmels è gia en la vegliadetgna da pensiun. Corsin Demarmels sez è gia l’onn 2006 stà il president dal comité d'organisaziun da la festa da musica districtuala a Salouf. El po profitar da lezzas experientschas, accentuescha però che bler saja sa midà dapi lura – tant tecnicamain sco era quai che pertutga l'organisaziun.
Istorgia
L'atun 1979, ina sonda saira, èn trais giuvens s'inscuntrads per far musica: Franco Simonet (Stierva), Adrian e Stefan Demarmels (Salouf). Ils scolars Adrian e Franco avevan dumandà Stefan sch'el po mussar ad els da sunar trumbetta. Stefan Demarmels aveva emprendì en la scola claustrala a Mustér da sunar trumbetta. L' inscunter dad els trais è s'extendì adina dapli e l'onn 1987 èsi lura stà uschè lunsch, la Musica instrumentala Salouf Mon Stierva è vegnida fundada e dapi lura è Stefan Demarmels ses dirigent. Anc adina fa la musica sias emprovas la sonda saira ed è er daventada ina musica da la vallada, ina furmaziun d'armonia. Il 1998 ha la musica cumprà l'uniforma actuala e quella vegn uss remplazzada.