Salouf - Butia dal vitg duess serrar – Pro Prima sa dosta

La  vischnanca sustegna bain il negozi cun localitads gratuitas, cun electricitad gratuita e cun ina contribuziun annuala da 5'000 francs – tuttina na saja il manaschi a lunga vista betg pli supportabel, ha ditg Bruno Wasescha, il president da la Societad da consum Savognin e conturn.

Era vegls cumpran en l'internet

Ils davos onns saja sa midà il cumportamaint da cumpra – era tar ils attempads. Uschia fetschian blers e bleras las cumpras via internet u sa laschian purtar las cumpras da confamigliars, uschia Wasescha. En il rom sajan stads ils custs da persunal, ma perquai che blera rauba saja giu dal datum stoppia quella vegnir scritta giu. Automatisar la butia na saja nagina soluziun per l’avegnir.

Naginas desditgas

Desditgas na dettia naginas: Uschia saja ina da las vendidras gia en la vegliadetgna da pensiun, ed in’autra vendidra che vegniva da Savognin a Salouf, possia en l’avegnir vegnir engaschada mo pli en il Volg da Savognin.

Pro Prima envida a discussiun

In cuntervent vegn or dal la vischnanca sezza: La cuminanza d’interess Pro Prima envida la populaziun ad in inscunter per discutar sur dal futur da la butia. La scuntrada ha lieu ils 13 da fanadur a las 19:00 en l’ustaria Alpina. La cuminanza d’interess vul sclerir, sche la serrada saja inevitabla u sch’i dess alternativas.

President communal respunda las dumondas al lieu

Ils 15 da fenadur tranter las 9:00 e las 11:00 vegnan il president communal da Surses Daniel Wasescha, sco era Bruno Vasescha, il president da la Societad da consum Savognin e conturn, ad esser preschents en la butia da Prima a Salouf per respunder dumondas da la populaziun. Gia ordavant è vegnida tramessa ina brev a las chasadas da Salouf, cun ils motivs da la serrada.