Atgnamain vulevan ils frars Linard e Nicolin Sonder far or dal bain puril a Salouf, che na vegniva betg pli duvrà, in’ovra cun chalira a distanza. Pervi d’in recurs è quest project però vegnì annullà. Perquai han ils frars tschertgà in’autra soluziun per realisar in project d’energia. En la zona d’industria da Salouf han els realisà in’ovra che producescha electric. Radund 165 kilowat è la prestaziun maximala.
Gia en funcziun dapi dus onns
Per producir electric vegnan arsas zinslas da laina che vegn producida davant l’ovra electrica. Quellas zinslas vegnan setgentadas en l’ovra e suenter arsas. Cun gasifitgar questa energia vegnan mess en moviment trais generaturs, che produceschan electric. Quel vegn manà en la rait. L’entir indriz marscha 365 dis a l’onn durant 24 uras – en funcziun è el dapi dus onns. Grazia daners dal program da la confederaziun KEV/ICF (Indemnisaziun per cuvrir ils custs da la furniziun), po l’ovra vegnir manada cun gudogn, dian ils frars Sonder. Per construir l’ovra electrica han els era survegnì daners da l’agid da muntogna.
Mo paucas ovras en Svizra
Cun la producziun d’electricitad cun zinslas da laina van ils dus frars Sonder atgnas vias en Svizra. Talas installaziuns datti mo paucas en Svizra. Perquai deriva la tecnica installada a Salouf dal Tirol dal Sid. En l’Italia è questa tecnica pli derasada.
Bain puril è vegnì reactivà
Per il bain puril a Salouf, che na vegniva betg pli duvrà, han ils frars Sonder era chattà ina schliaziun: La sora Gianna Sonder maina ussa il bain puril cun ses partenari.