L'ospital Tusaun para plaun plaunet da vegnir a paus. Ils ultims onns aveva el gronds problems finanzials. L'onn da gestiun 2023 ha l'ospital serrà cun in deficit da record da 8.6 milliuns francs. Per consequenza sajan ins ids sur ils cudeschs. Ina da las grondas decisiuns saja stada da desister da la partiziun da naschientschas per sa focussar sin il provediment da basa.
Il CEO da l'ospital Tusaun, Sandro Pirovino, declera che la serrada da la partiziun da naschientschas saja stada in process fitg dolurus per tuts. El sez saja naschì en quest ospital ed haja stuì suttascriver las disditgas per las spinderars durant ses emprim di da lavur.
Vias pli lungas
Dapi in onn è la partiziun da parturir da Tusaun ussa serrada. L'emprim eri stà provisoric, suenter definitiv. Quai munta per las dunnas d'Avras fin Giuvaulta, da Valragn fin Bravuogn, da Planeiras e Surses, viadis pli lungs. Ma per il Grischun na saja quai nagut extraordinari, manegia il minister da sanadad Peter Peyer. Persunas che stattan en Val Müstair, Bregaglia u Puschlav hajan era gia pli ditg da far quint cun viadis pli lungs per ir en in ospital cun ina partiziun da parturir.
Process da transfurmaziun
La serrada da la partiziun da naschientschas saja stada ina da bleras consequenzas dal process da transfurmaziun da l'ospital Tusaun – e quella transfurmaziun para da purtar fritg. Peter Peyer è cuntent cun il progress che l'ospital Tusaun ha fatg ils ultims sis mais, dapi sia davosa visita. Lezza giada anc avant che las vischnancas purtadras eran s'exprimidas per in futur cun l'ospital a Tusaun. «Quai mussa ch'ins ha stuì prender ina via difficila, ma ch'i sa paja ussa. Quai fa natiralmain plaschair a nus sco chantun, perquai che nus vesain che quai è in pass impurtant per ch'il provediment da sanadad regiunal possia vegnir garantì vinavant.»
Occupà quasi tut las funcziuns clav
Ed er il CEO da l'ospital Tusaun, Sandro Pirovino, tira fin ussa in facit positiv: «Nus vesain effects fitg clers. Da la vart da collavuraturas e collavuraturs è la quota da fluctuaziun sa reducida fermamain, nus avain puspè pudì occupar quasi tut las posiziuns clav vacantas. Da la vart da pazientas e pazients remartgain ina creschientscha, tant en il sectur staziunar sco er ambulant. Il dumber da pazientas e pazients crescha pia puspè. E tar la fundaziun remartgain mais per mais e pass per pass meglras cifras finanzialas. Uschia pudain ir rinforzads en l'avegnir.»
Defizit pli pitschen
Tut en tut tuna quai pia uschia sco sche l'ospital Tusaun pudess quintar quest onn cun cifras nairas? Uschè simpel na saja tuttina betg, manegia il CEO Sandro Pirovino. Ina nulla naira saja sut las circumstanzas actualas, dal panorama d'ospitals en Svizra ed er en il Grischun, absolutamain impussibla per in ospital regiunal, declera el.
La tendenza è per l'emprima giada dapi in pèr onns positiva.
Ma ins possia reducir pass per pass il deficit da record da 8,5 milliuns dal 2023: «Nus avain quest onn in preventiv da 7,7 milliuns e vegnin, tenor la calculaziun actuala, a pudair restar sut quest preventiv – e quai per l'emprima giada dapi in pèr onns. La tendenza è positiva.» Ma i dettia anc ina massa da far, schiditg che las sfidas en il sectur da sanadad cun custs pli auts ch'entradas restan, manegia il CEO.