Savognin - Canorta Tgimirola tschertga nov dachasa

La prioritad è da chattar in nov dachasa. La localitad actuala è en ina zona da privel sper la Gelgia e na permetta betg da construir ina plazza da giugar. La veglia è vegnida spazzada e na po betg vegnir remplazzada. Sco quai che Petra Simonet, la manadra pedagogica, ha ditg, fetschia prescha, perquai che l'Uffizi dal servetsch social lubeschia mo pli fin la primavaira proxima ina canorta senza plazza da giugar.

Canorta spera sin sustegn da la vischnanca

L'uniun Laibella spera da chattar proximamain ina schliaziun, cun il sustegn da la vischnanca e da la populaziun. Duas immobiglias che vegnissan en dumonda fissan la Villa Aurora a Savognin (l'actuala scolina) e la scola da Salouf. Tuttas duas immobiglias fissan eventualmain adattadas per la canorta futura. Daniel Wasescha, il president communal da Surses ha ditg ch'ins na possia per il mument betg empermetter quellas immobiglias per la canorta. La raschun saja ch'i na saja betg anc cler sche la nova scola a Savognin saja allura era pronta sin l'entschatta da l'onn da scola 2026. Plinavant veglia la vischnanca far ina strategia da tut las immobiglias sin territori communal, quai dovria anc temp, uschia Wasescha. La canorta è impurtanta per la regiun – radund 40 uffants visitan ella mintg'emna. La canorta Tgimirola festivescha quest onn ses dieschavel anniversari.