Il center da sanadad Savognin fa midadas grondas. Sin la proxima radunanza generala sa retiran quatter dals tschintg commembers dal cussegl d'administraziun. En il cussegl resta mo Fabio Berry, entant che Peder Cathomen (president), Daniel Wasescha (vicepresident, represchentant vischnanca), Jeanette Mösli e Giorgio Signorell sa retiran. Da nov a disposiziun sa mettan Luzi Thomann (president), Patric Vincenz (vicepresident, represchentant vischnanca), Fabio Luzio e Lea Moriggl, communitgeschan direcziun e cussegl d'administraziun dal center da sanadad.
Nova direcziun cun CEO Stefan Schumacher
Dapi che la directura Claudia Husmann aveva bandunà il center da sanadad Savognin il mars passà, manava Sandra Luzio il center ad interim. Questa schliaziun ad interim duai finir cun il prim da fanadur, cura ch'il nov CEO per il center da sanadad Stefan Schumacher surpiglia.
Davart raschuns per questas midadas n'han cussegl d'administraziun e direcziun ad interim communitgà nagut. Sulet che questa constellaziun instradada saja il resultat d'ina collavuraziun tranter cussegl d'administraziun actual, represchentants dal cussegl d'administraziun futur, cun la suprastanza communala, cun il comité da la «Iniziativa Center da Sanadad Savognin» e la «Cuminanza d'interess Center da Sanadad Savognin».
Proxims pass: Elecziuns ed infurmaziuns
L'elecziun dal nov cussegl d'administraziun saja previsa per la radunanza generala da la Center da Sanadad Savognin SA dals 12 da zercladur. Il center da sanadad annunzia dapli infurmaziuns per la radunanza communala dals 16 da zercladur. Là èsi era previs d'infurmar davart ils proxims pass pertutgant l'iniziativa dal pievel inoltrada l'october passà.
Cun 400 suttascripziuns – da 100 necessarias – vegn pretendì da far ina lescha per metter a disposiziun al center da sanadad avunda meds finanzials per garantir il provediment da sanadad da basa sur onn cun custs cuvrids. Quai suenter ch'il center aveva repetidamain scrit cifras cotschnas.