Dapi l’entschatta da l’onn enfin oz haja quai dà radund 1'000 dumondas per subvenziuns, ha ditg Andrea Lötscher, il manader da la partiziun effizienza energetica da l’uffizi d’energia e traffic. En in onn normal haja ins en media 1'200 dumondas en in entir onn. Quai muntia, ch’ins haja dublegià las dumondas. En tut stettian quest onn a disposiziun 50 milliuns francs, per promover sanaziuns energeticas e per remplazzar stgaudaments vegls.
Il chantun organisescha pliras sairas d'infurmaziun tar quest tema, pia tge subvenziuns ch’i dat per sanar chasas, e la banca infurmescha co ch’ins po finanziar las renovaziuns.
Sut il titel «Green Deal» vul il Grischun daventar neutral al clima fin l'onn 2050. Promover sanaziuns energeticas è be ina da pliras mesiras en quest plan ambizius.
