Per la directura da Savognin, Bivio, Alvra turissem Tanja Amacher èn ils skiunz austriacs la meglra reclama pussaivla: «Uschia vegnan televisiuns e gasettas a Savognin e rapportan or da la regiun», è Amacher cuntenta. «Ina reclama gratuita e nunpajabla.»
Pussaivel è quel trenament grazia als possessurs austriacs da las Pendicularas Savognin, ch'han buns contacts cun la Federaziun austriaca da skis. Quants dis e durant tgenin temp ch'ils austriacs e las austriacas da tut las disciplinas vegnan a trenar sin las pistas FIS da Savognin n'è anc betg sclerì dal tut.
Savognin, Bivio Alvra turissem vegn durant il campiunadi mundial da skis alpin a far dapli reclama e nizzegiar il traffic supplementar tras la val per far attent sin il territori da skis.
