Savognin - Far pasta enstagl da cuschinar

Suenter esser stà 30 onns cuschinier haja el vulì empruvar ora insatge da nov, ha ditg l’um da 48 onns che deriva da Sedrun ed è creschì si a Savognin suenter ch’el ha gì nov onns. El saja persvas, ch’el vegnia ad avair success cun sia nova manufactura. Quella maina el ensemen cun sia partenaria. La gronda part dals products duess vegnir vendida en la butia che sa chatta gist sper la manufactura. La pasta da la manufactura Capricorn duess però era chattar la via en butias da la regiun ed en la gastronomia.

Pitschen e bun duess l’affar esser di Otavio Cavegn, e quai cun products d’auta qualitad, sche adina pussaivel cun products da la regiun. Dals purs da Salouf Marina e Rolf Sennhauser-Wismer ha Otavio Cavegn gia cumprà passa 500 kilogramms semulina da furment cun il label da bio demeter.