Sco quai che Luzi Thomann, il president da la Fundaziun Hotel Piz Mitgel, ha ditg envers RTR – saja il contract da cumpra cun il hotel Piz Mitgel suttascrit. Il pretsch da cumpra da l'hotel muntia a radund dus milliuns francs. Ulteriurs dus milliuns francs vul la fundaziun investir en il hotel durant la stad. Actualmain vegnia la renovaziun planisada.
L’avertura dal hotel renovà duess succeder gia avant Nadal, ha ditg Luzi Thomann. Probabel dettia pli tard anc ina segunda ed ina terza fasa da renovar. Manà vegnia il hotel dal pèr Marlies e Michael Gehring, quels han manà l'hotel Alpina Mountain Resort & Spa a Tschiertschen, avant che quel è vegnì serrà. Il persunal actual dal Hotel Piz Mitgel po lavurar vinavant per l'hotel, sch'il giavisch è qua.
Era in engaschi cultural per la val
La fundaziun Piz Mitgel Val Surses ch’è vegnida fundada avant curt, vul s’engaschar per il manaschi, la protecziun ed il mantegniment da l'hotel da tradiziun al stradun a Savognin. Plinavant vul la fundaziun s’engaschar per la cultura en il Surses, stat scrit en il Fegl uffizial chantunal.
Tenor il text en il fegl uffizial po la fundaziun sustegnair era autras instituziuns e bains culturals, e promover la vita culturala en la val. Presidiada vegn la fundaziun da Luzi Thomann da Pfäfers, oriund da Parsonz. El è era il president da la Turissem Savognin Bivio Alvra SA. Vicepresidenta da la nova fundaziun è Eveline Saupper da la vischnanca Albula/Alvra. Commember da la fundaziun Piz Mitgel Val Surses è Bruno Weber da Russikon/Turitg.
Gia plirs onns ha Sepp Waldegg empruvà da vender ses Hotel Piz Mitgel. Sepp Waldegg maina dapi l’onn 1985 il hotel ensemen cun sia dunna Regina. Il hotel da tradiziun vegn gia pli che 60 onns manà da la famiglia Waldegg. Construì è l’hotel vegnì ils onns 1870.
