L'hotel Piz Mitgel è vegnì renovà per radund tschintg milliuns francs. Finanziada è la renovaziun vegnida da la Fundaziun Piz Mitgel Val Surses, 250'000 francs ha la vischnanca da Surses pajà. L’avertura è planisada ils 12 da december.
Sco quai che Luzi Thomann, il president da la fundaziun ha ditg envers RTR, ins haja realisà tut ils giavischs en l’intern dal hotel. L’auter onn saja planisà da renovar la fatschada. La fundaziun saja il mument anc adina sin la tschertga da donaturas e donaturs.
Naginas plazzas libras pli
Sco quai che Marlies e Michael Gehring, ils novs ustiers han ditg, ins haja pudì occupar tut las 20 plazzas. Sco schef cuschinier ins haja emplojà il tiroles Ernst Schmidt, che lavurava avant en il Principadi dal Liechtenstein.L'hotel da trais stailas veglia sa posiziunar sco hotel per pèrs, l’ustaria saja averta per tuts. Ins pondereschia il mument era sch’i duess dar in menu da mezdi per lavurantas e lavurants. Betg pli avert per il mument è il bogn cuvert. L’auter onn vegnia decidì sch’i vegnia a dar in’alternativa. Ina pitschna zona da wellness dettia quai gia ussa en il hotel. En tut ha l'hotel Piz Mitgel passa 40 chombras. Avert vegn il hotel ils 12 da december da quest onn.
