Siglir tar il cuntegn

Header

cuntegn

Savognin Hotelier Lucernais surpiglia Piz Mitgel

Il hotelier lucernais Martin Luzzi surpiglia l’entschatta da december la direcziun da l'hotel Piz Mitgel. L’um da 32 onns è stà absolvent da la scola da hotel «Belvoir» a Turitg. Suenter haja el lavurà en chasas da pliras stailas, scriva la Fundaziun Medias Rumantschas.

La fundaziun ch’ha cumprà il hotel Piz Mitgel a Savognin ha communitgà tgi che surpiglia la direcziun dal hotel e daventa successura dals ospitants partents Michael e Marlies Gehrig. Cun l’entschatta da la stagiun d’enviern 2022/23 segna Martin Luzzi per la direcziun dal hotel. El è naschì il 1990 a Lucerna ed è burgais da Rossa en la Val Calanca. La fin da quest onn vegnia el per l’emprima giada bab e sin quel mument sa legria el fitg.

Ina carriera classica

Suenter la scola commerziala ha Martin Luzzi lavurà en l'hotel «Storchen» a Turitg, ina chasa da tschintg stailas. Lavurà ha el en la partiziun da contabilitad, tar «F&B» (spaisas e bavrondas), organisà banchets ed er lavurà a la recepziun. Il Lucernais ha er fatg cun success la scola da hotel «Belvoir» a Turitg. Durant quel temp ha el lavurà sco cuschinier en il restaurant «Le Poisson» ed er sco camarier ed a la bar. Quel restaurant è ina da las ustarias dal hotel «Glärnischhof» a Turitg, in hotel da quatter stailas. Il nov directur dal hotel Piz Mitgel è er stà engaschà per la chadaina da hotels «Swiss Quality Hotels» (60 hotels) e manà ha el era l'hotel «HYVE» a Basilea, ina chasa cun 160 letgs.

En il hotel Piz Mitgel vul Martin Luzzi metter accents cun ina buna cuschina, in service gentil, quai tut en in’ambient empernaivel e liber tenor il motto: nuncumplitgà però cordial. Ils restaurants duain daventar lieus cun ina buna purschida culinarica per indigens e giasts. Ina rolla centrala haja qua il manader dal restaurant Thomas Nussbaumer,  in um dal rom.

Martin Luzzi è il nov directur dal hotel Piz Mitgel a Savognin.
Legenda: Martin Luzzi è il nov directur dal hotel Piz Mitgel a Savognin. fmr

RTR novitads 18:00

Artitgels legids il pli savens

Scrollar a sanestra Scrollar a dretga