Romano Plaz (80) da Savognin sa regorda anc bain vi da l’atun dal 2019. Igl era ina saira cun leva plievgia, curt suenter las set e mesa. El era sin viadi cun ses auto ad ina prova cun ses chor. Igl era vi dal vegnir stgir e be per pauc fiss el siglì cun ses auto en in collega dal chor, perquai che quel n’era betg bain visibels pervi da sia vestgadira stgira.
Suenter quest incap è el sa decidì, da s’engaschar dapli per la segirtad. El sez guardia adina d’avair vestgadira clera, plinavant haja el la stad cura ch’i saja stgir adina si in chapi colurà e l’enviern ina chapitscha cotschna. In enconuschent haja ina giada ditg ad el ch’el saja il «nanin d’iert.» Questa nominaziun na fetschia betg mal ad el, il cuntrari saja il cas: El saja losch da quai ed uschia daventia la segirtad adina puspè in tema. Per el saja impurtant da sensibilisar la glieud da sa vestgir meglier la saira u da nizzegiar reflecturs u glischs, per daventar pli visibels. Losch è Romano Plaz plinavant sin in artitgel ch’è cumparì en la revista Salute, in magazin che s’engascha per la sanadad e la qualitad da viver. Là haja el pudì far attent quant impurtant che la visibilitad sin via saja.
