Istorgia ed istorgias è il titel dal cudesch che guarda enavos sin ils davos 150 onns. Il cudesch è scrit en tudestg e cumpiglia en rumantsch inqualas poesias da Pader Alexander Lozza. El sa drizza en emprima lingia ad interessads da l’istorgia, ed als giasts da l'hotel. En il cudesch èn descrittas las trais epocas da l'hotel.
Igl è betg in cudesch che sto vegnir legì dad a enfin z, di l’autur dal cudesch Peder Plaz. El haja empruvà da far il cudesch uschia ch’ins po era leger mo in chapitel, senza da manchentar insatge. En il cudesch datti era anecdotas e raquints da pli baud. Part dal cudesch fa era l’istorgia dals frars Bistiang e Leza Wasescha da Savognin, ch'èn stads mercenaris en l’Italia. Els avevan fundà l'hotel l'onn 1870, per profitar dal turissem da cura e dal traffic sur il Pass dal Güglia.
Istorgias dals ultims 40 onns
Ulteriuras anecdotas hai dà da l'anteriur possessur dal hotel Piz Mitgel Sepp Waldegg, ch’ha manà il hotel ils ultims bun 40 onns. En quels quatter decennis avevan el e ses hotel gì da surmuntar intginas turbulenzas – e durant tals temps ha el scrit si ses partratgs. Or da quels diaris èn era da leger en il cudesch.
Ils 18 da settember è Sepp Waldegg mort en la vigliadetgna da 77 onns.
