Il project cumpiglia trais plazzas da tennis per la stad, l’enviern vegn la plazza duvrada per in glatsch, che po vegnir duvrà per ir cun patins, giugar hockey, curling e tir da tschoccas. Gist sper las plazzas duessi dar gardarobas, indrizs sanitars ed ina ustaria. Quella duess remplazzar l’ustaria existenta tar il runal da La Nars. La suprastanza communala propona d’approvar la fatschenta.
Leo Thomann, il president communal da Surses ha ditg envers RTR, ch’il project saja da grond’impurtanza per ils indigens, sco era per ils turists. Cun radund 380'000 francs duessan las uniuns da la val sa participar vi dal project. Per quest intent datti ils 5 da favrer in di da sport cun ina cursa lunga da sponsurs. Tut las entradas da quest di duessan vegnir duvradas per la plazza da sport nova.