Siglir tar il cuntegn

Header

audio
Savognin / Parsonz – Claudio Dedual surdat il taxi cun schlieusa a motor
Or da Total local dals 20.12.2021.
abspielen. Laufzeit 5 minutas 3 Sekunden.
cuntegn

Savognin / Parsonz Taxi cun schlieusa a motor va en novs mauns

Prest 20 onns è Claudio Dedual da Parsonz (54) charrà cun sia schlieusa a motor en il territori da skis da Savognin. En tut quels envierns ha el gì bleras bellas e main bunas experientschas. A partir da quest enviern surpiglia l’ustaria Steil’Alva da Radons quest servetsch.

L’idea da porscher in servetsch da taxi sin la naiv ha Claudio Dedual gì, cura che la Pendiculara da Savognin – Malmigiucr - Radons è vegnida demontada. Perquai che Radons n’è betg pli stà cuntanschibel sin via directa cun la pendiculara, ha Dedual lantschà quest servetsch da taxi. Enfin otg persunas ha el mintgamai transportà cun in char annex vi da la schlieusa a motor. Era giasts prominents ha el transportà, in da ses giasts regulars è stà la chantadura taliana Gianna Nannini, che possedeva ina chasa da vacanzas en il territori da skis da Savognin. Sco quai che Dedual ha ditg envers RTR, haja el fatg il servetsch da taxi adina cun grond plaschair. El haja stimà il contact cun ses giasts ed anc oz haja el bunas amicizias cun glieud ch’el enconuschia dal ir cun taxi.

Sin viadi cun «Alpöhi»

Mintgatant deva quai era engaschis spezials per Dedual. Uschia ha el durant duas emnas gidà a far transports per il film da Heidi, ch’è per part vegnì filmà en il Surses. Losch saja el ch’el haja per ina scena dal film pudì trair la schlieusa da l’actur principal Bruno Ganz e quai durant ina scena da film. In’auter engaschi spezial saja stà quel, cura ch’el saja vegnì clamà per transportar ils pumpiers tar in’acla cun in brischament d’in chamin. En bella regurdientscha ha Dedual era il di, nua ch’el ha chattà in uffant ch’aveva pers ses geniturs e spetgava dasperas la via en il fraid. Ina regurdientscha che fa anc oz vegnir trist l’anteriur taxist da schlieusa a motor è quel di avant passa diesch onns, nua ch’ina gruppa d'indigens era vegnida en ina lavina.

Taxi va en novs mauns

A partir da quest enviern surpiglia l’ustaria Steil’Alva da Radons la fatschenta da taxi e quai sut il num Snoxi.ch Da nov pon vegnir fatgs viadis era durant l’emna e sco adina po er vegnir transportada bagascha. Sco quai che Claudio Dedual ha ditg, veglia el gugent era gidar ora cun sia experientscha, sch’i fetschia da basegn.

RTR Total local 11:45

Artitgels legids il pli savens

Scrollar a sanestra Scrollar a dretga