Sia motivaziun da surpigliar quest post saja il rumansch ch’al stettia fitg a cor. La purschida da la SRG cun sia unitad d’interpresa RTR saja fitg impurtanta per la derasaziun ed il mantignament dal rumantsch, la chapientscha dals divers idioms e la finala per la coexistenza tranter las diversas culturas rumantschas ed uschia tut las Rumantschas ed ils Rumantschs, ha ditg Patric Collet. Il Cussegl dal public cumpiglia 15 commembras e commembers.
Nova iniziativa fa quitads al directur general
Il directur general da la SRG Gilles Marchand ha ditg en ses pled, che sche las finanzas stettian stabilas ils proxims onns, possia la SRG er en l’avegnir offrir purschidas da giuven fin vegl e quai malgrà che las entradas sa sminueschian vinavant. Dapi il 2018 haja la SSR realisà in program da spargn da radund 150 milliuns. Ils proxims onns saja da quintar ch’ins vegnia en ina fasa da consolidaziun. Novas malsegirtads sajan en vista sin camp politic. In comité dominà da la Partida populara svizra haja lantschà l’iniziativa dal pievel cunter la SSR. Suenter No Billag 1 dettia ussa quasi l’iniziativa No Billag 2. Questa iniziativa pretenda tranter auter che las taxas da radio e televisiun vegnan sbassadas da 335 sin 200 francs. Las consequenzas d’in gea a questa iniziativa avess grondas consequenzas sin la situaziun finanziala da la SSR. Ina gronda sminuziun dal persunala fiss inevitabla, ha ditg Marchand. La SSR piglia fitg seriusa l’iniziativa. El saja persvadì ch’ins possia gudagnar la votaziun cun in cuntegn d’auta qualitad e gronda diversitad. Cun ina votaziun en chaussa saja da quintar en circa quatter onns.
Regenza vul cumbatter l'iniziativa
Plinavant ha referì Marcus Caduff, il president da la regenza grischuna. El ha ditg che las reportaschas da RTR ed SRF dal Grischun sajan da fitg auta qualitad. El fetschia quitads davart l’iniziativa che vul reducir las taxas da medias en Svizra. Tranter auter perquai che plazzas da lavur pudessan ir a perder en il Grischun, e la diversitad da rapportar davart il Grischun giess a perder. Ch’ils maletgs da las emissiuns televisivas vegnian emessas en l’entira Svizra haja er in’immensa impurtanza turistica per il Grischun. La regenza grischuna sappia tge ch’ins haja cun las purschidas da RTR. Uschia ch’era la nova regenza grischuna vegnia a sustegnair il cumbat cunter l’iniziativa nova che vul reducir las taxas da las medias svizras.
Buns rapports davart la guerra en l'Ucraina
Il president da la SRG.R Vincent Augustin ha tranter auter menziunà tge sfidas che las medias hajan il mument da rapportar equilibrà e confurm a la vardad davart la guerra en l’Ucraina. Era sche quai saja pretensius, saja quai ord vista dad Augustin grategià bain fin ussa als emetturs da la SSR. Era el fetschia grond quitads davart l’iniziativa da taxas da medias, che chaschunass in grond desaster per l’entira SRG SSR. Ins quintia che las contribuziuns dad oz 1,25 milliardas francs vegnissan reducidas sin circa 600 fin 700 milliuns. Mantegnair la purschida sco fin oz na fiss uschia betg pli pussaivel.
Translatar rumantsch en autras linguas
Il schefredactur Flavio Bundi ed il directur da RTR Nicolas Pernet han preschentà in program che vegn proximamain a pussibilitar la translaziun da texts rumantschs en tudestg ed en autras linguas. Uschia saja tranter auter pussaivel da leger texts rumantschs per exempel da la pagina d’internet rtr.ch en si’atgna lingua. Plinavant è vegnida preschentada la visiun cun la tala RTR vul daventar la plattafurma da tuts quels che vivan en il Grischun ed han ina relaziun cun il Grischun. Per quai duessan tut ils chanals da publicaziuns pussaivels vegnir nizzegiads.
Quint serra cun in plus
Il quint annual da la SRG SSR Svizra Rumantscha serra cun entradas da radund 354’000 francs tar expensas da radund 280’000 francs cun in plus da circa 59’000 francs.
