Savognin - Project da scola nova è sin buna via

Sco quai ch’il suprastant da Surses Giancarlo Torriani ha ditg, stoppian ins, stan oz, quintar cun custs da radund 15 milliuns francs. Per la garascha sutterana saja da quintar cun radund trais milliuns francs.

Scola veglia vegn sbuvada

Planisà è che la scola primara vegnia sbuvada. En la scola primara e scoletta che duess vegnir construida visavi da l'hotel Romana, duess avair lieu l’instrucziun. Da l’auter maun da la plazza da sport è planisà in segund bajetg, che vegn tranter auter duvrà per la maisa da mezdi. La sala Grava cun halla da gimnastica duess vegnir renovada energeticamain. Il lavuratori da la vischnanca che sa chatta en quest bajetg duess da nov vegnir duvrà per biros.

Scoletta banduna lieu actual

Gia decidì ha la suprastanza communala che la scoletta vegnia a bandunar las localitads cun la finiziun da la l’onn da scoletta questa stad. La raschun saja ina concentraziun memia auta da radon en il plaun sutterran. A partir da quest avust vegnia la scoletta manada en la Villa Aurora a Savognin. Là stettian ils uffants fin che la nova scola saja construida. Durant las lavurs da construcziun da la nova scola vegn la scola primara manada a Salouf en la scola ch’è vegnida serrada. Pertutgadas èn l’emprima fin la quarta classa. Vi da l'urari da la posta dovria quai mo pitschnas midadas, ha ditg Torriani.