Siglir tar il cuntegn

Header

audio
L'emprim Nordic Cup a Savognin
Or da Actualitad dals 31.01.2022.
abspielen. Laufzeit 4 minutas 15 Sekunden.
cuntegn

Savognin/Rona Dino Bellini da Savognin gudogna il Val Surses Nordic Cup

Bellini ha fatg 200 puncts tar las cursas da sonda e dumengia. Cun mintgamai 140 puncts èn Peter Niederberger e Stephan Durisch sin il segund plaz. Tar las dunnas ha gudagnà il cup Eliane Müggler da Thal, sin il segund post è Bianca Bergamin e sin il terz post Sandra Poltera.

La sonda hai dà a La Nars a Savognin in percurs cun obstachels, sigls e slalom, cun radund 30 participantas e participants. La dumengia èn stadas las cursas en differentas categorias cun fin 12 kilometers distanza. Ils uffants han fatg cursas da tranter in kilometer fin 3.5 kilometers. Igl è stà pussaivel da sa participar era mo a las cursas da sonda e mo la dumengia. La cursa sur 12 kilometers da dumengia ha gudagnà Robin Locher da Herisau cun in temp da 31:08.7. Tar las dunnas ha gudagnà la cursa da dumengia Carola Janutin da Favugn cun in temp da 40:09.6.

Comité d'organisaziun è cuntent

Sco quai che Peter Niederberger dal comité d’organisaziun e president dal club Nordic Surses ha ditg envers RTR, duess il Nordic Cup vegnir organisà mintg’onn. Il cup na stoppia betg adina vegnir organisà al medem lieu, l’entira val duess profitar dal cup. La finamira na saja betg da sa participar al Swiss Loppet, la seria da las pli grondas cursas popularas da la Svizra. L’idea saja ch’il plaschair stettia en il center, uschia Niederberger.

Al Nordic Cup duessan er sa participar sportistas e sportists ch’èn magari betg uschè fits. Il pli impurtant saja d’avair plaschair da far cursas. Niederberger sa giavischass che las passlungistas ed ils passlungists vegnissan regularmain al Nordic Cup e ch’i vegnian mintg’onn vitiers novas persunas. Quai che pertutgia ils uffants e è il president da Nordic Surses fitg cuntent. Il club haja en media adina radund 25 uffants, e per els saja quai adina in grond plaschair da pudair sa mesirar ad ina cursa.

RTR actualitad 07:00

Artitgels legids il pli savens

Scrollar a sanestra Scrollar a dretga