Il Lai Barnagn ch’è l’enviern in parcadi, porscha bleras attracziuns durant la stad. Uschia èsi pussaivel dad affittar uschenumnads «standup paddles», in pedalo ed era ina bartga cun rembels. Noss redactur Federico Belotti ha guardà tge che curra e passa in di da chaliras al Lai Bernagn.
Era Sybille Diethelm ch'è chantadura tar il festival cultural Origen è cun ses um Basil Vollenweider ed il figl Vitus al Lai Barnagn. Durant las pausas po ella giudair cun sia famiglia las purschidas da stad.
La ruschnera da 100 meters
Enfin il prim d’avust datti ina ruschnera temporara al Lai Barnagn. Cun in tschertgel da nudar èsi pussaivel da glischnar giu d’ina scarpa radund 100 meters giuadora. L’aventura finescha direct en il lai. Ella è averta mintgamai tranter las 11:00 – 17:00. Per nizzegiar la ruschnera dovra quai in bigliet che po vegnir cumprà al lieu. La ruschnera è mobila. Ella è per exempel gia ina giada stada installada amez la citad da Son Gagl.
La responsabla per la ruschnera Cornelia Diaz Demarmels di, che l'idea per ina tala attracziun saja stada da porscher insatge different als giasts. E cura ch'els han udì ch'il «Radio Zürisee» venda questa ruschnera, han ins cumprà quella. Il proxim onn duai la ruschnera puspè vegnir en funcziun.
