Siglir tar il cuntegn

Header

cuntegn

Savognin/Samedan Mazlaria Peduzzi expandescha

David Steier che maina la mazlaria Peduzzi a Savognin, surpiglia la butia da la mazlaria Plinio a Samedan. A partir dal favrer vegn quella manada sco mazlaria Peduzzi. Plinavant tschertga la mazlaria Peduzzi ina nova soluziun per remplazzar la chasa da maz a Savognin ch’è vegnida en ils onns.

Cun la nova filiala a Samedan veglia el en l’avegnir pudair producir dapli, ha ditg David Steier envers RTR. El vesia la nova butia a Samedan sco gronda schanza per l’avegnir. Plinavant possia el surpigliar divers clients da la gastronomia e hotellaria da la mazlaria Plinio da Samedan.

Il num da la mazlaria Peduzzi duai valair era a Samedan, Steier veglia uschia nizzegiar la buna reputaziun era en l’Engiadina. La mazlaria Plinio a Samedan è vegnida vendida pervi da motivs da sanadad dal possessur.

Nagina chasa da maz a Savognin pli

Dapi l’entschatta da quest onn na vala la lubientscha da nizzegiar la chasa da maz a Savognin betg pli. Pervi da custs memia auts na vul David Steier betg renovar quella. Era il lieu entamez vischnanca na saja betg adattà. En l’avegnir vul David Steier laschar mazzar sia biestga en ina autra chasa da maz en Grischun, plinavant saja el en tractativas da pudair laschar mazzar sia biestga a Flums en il chantun Son Gagl. Elavurada vegn la charn però vinavant en l’anteriura chasa da maz a Savognin ed en las localitads al stradun.

RTR actualitad 12:00

Artitgels legids il pli savens

Scrollar a sanestra Scrollar a dretga