Per stgaudar cun laina datti trais pussaivladads: Quai po esser cun laina dad arder fendida, cun zinslas u cun pellets. La pli pauca lavur datti cun pellets, cunquai che quels pon, sco ieli, vegnir pumpads davent dal camiun fin là nua ch’els vegnan conservads. La pigna funcziuna suenter automaticamain. Dapli da far datti tar pignas centralas, quellas ston cura ch’i fa fraid vegnir emplenidas mintga di, hai gì num a l’infurmaziun a Savognin.
Dapli laina per stgaudar
En Svizra hai dà l’onn passà 539’166 stgaudaments da laina. L’onn 1990 eran quai anc 692’519. Questa sminuziun ha surtut da far cun il fatg, ch'i dat pli paucas pignas pitschnas. Perencunter datti oz blers stgaudaments cun ina dimensiun pli gronda. Uschia èn vegnids ars l’onn passà 5’581’642 meters cubics laina, il 1990 eran quai mo 3’251’345 meters cubics. Remartgabel è er il suandant: Devi avant 30 onns anc nagins stgaudaments da pellets, eran quai il 2020 gia 29’875.
Stgaudar cun laina è schuber
Sco quai che Jürg Fehlmann, il co-manader da fatschenta da la Liebi LNC SA, ha ditg, saja stgaudar cun laina neutral al CO2 ed uschia fitg ecologic. Cun stgaudar vegnia producì mo tant CO2 sco quai ch’ina planta transfurmia en oxigen en l’entira vita. Plinavant saja laina in product ch’i dettia en abundanza en Svizra.
Regular stgaudament gida a spargnar
Cura ch’in stgaudament è en funcziun, pon ins era spargnar energia. Cun reducir la temperatura cura che nagin è en chasa possian ins spargnar bler, ha ditg il cussegliader d’energia Georg Nicca. Perquai dettia oz meds tecnics che possian vegnir installads per exempel tar ils radiaturs. Sur in’app saja lura pussaivel da telecumandar il stgaudament. Tar chasas ed abitaziuns da vacanzas novas èn tals agids ozendi schizunt obligatorics.
Ord l'archiv
Sche rimnar laina dad arder daventa passiun
