L’idea da construir ina tur da glatsch per raiver devi gia l’onn 2000. Tar la staziun a val da la pendiculara a Savognin avevan intgins indigens construì ina tur da glatsch. Sco armadira figurava ina pitga d’ina gondla cun in fundament. Quai n’haja però betg funcziunà, uschia che tut saja vegnì allontanà, raquinta Adriano Peterelli da Savognin. Il raivider passiunà di ch’avant in pèr onns saja el stà a Malbun a raiver sin ina tur artifiziala da glatsch. Là saja naschida l’idea da laschar reviver l’idea d’ina tur da glatsch a Savognin.
Ils curs da raiver èn populars
Ed ussa èsi gia il quart enviern che la tur da glatsch vegn mintgamai construida per ils mais fraids da l’enviern. Il mardi e la mesemna datti mintgamai curs publics che pon vegnir visitads la saira. Sco quai che Peterelli di, sajan quels adina visitads fitg bain, ord raschuns da segirtad pon mintgamai be sis persunas esser il medem mument ad in curs. Experientscha dovria nagina per sa participar ad in curs.
La tur da glatsch vegn manada da l’uniun Vertical Walking. Ella ha otg commembers. Quels organiseschan mintgamai ils curs da raiver che pon vegnir visitads da persunas fittas che n’han nagina tema da l'autezza. Per garantir la segirtad, vegnan las participantas ed ils participants segirads cun ina suga.
