Siglir tar il cuntegn

Header

audio
Savognin: Visita tar la tur da glatsch per raiver
Or da Actualitad dals 21.02.2022.
abspielen. Laufzeit 3 minutas 25 Sekunden.
cuntegn

Savognin Tur da glatsch è creschida

Dapi il schaner è puspè en funcziun la tur da glatsch per raiver a La Nars dasper il runal da skis d’uffants. L’emprima giada è quella stada en funcziun l’enviern 2020/21. Aveva ella l’entschatta in’autezza da diesch meters, è ella ussa creschida sin 13 meters. RTR ha visità in curs da raiver.

L’idea da construir ina tur da glatsch per raiver devi gia l’onn 2000. Tar la staziun a val da la pendiculara a Savognin avevan intgins indigens construì ina tur da glatsch. Sco armadira figurava ina pitga d’ina gondla cun in fundament. Quai n’haja però betg funcziunà, uschia che tut saja vegnì allontanà, raquinta Adriano Peterelli da Savognin. Il raivider passiunà di ch’avant in pèr onns saja el stà a Malbun a raiver sin ina tur artifiziala da glatsch. Là saja naschida l’idea da laschar reviver l’idea d’ina tur da glatsch a Savognin.

tur da glatsch cun persunas che raivan lasura
Legenda: La tur da glatsch per raiver a Savognin ha in'autezza da 13 meters. RTR, Federico Belotti

Ils curs da raiver èn populars

Ed ussa èsi gia il quart enviern che la tur da glatsch vegn mintgamai construida per ils mais fraids da l’enviern. Il mardi e la mesemna datti mintgamai curs publics che pon vegnir visitads la saira. Sco quai che Peterelli di, sajan quels adina visitads fitg bain, ord raschuns da segirtad pon mintgamai be sis persunas esser il medem mument ad in curs. Experientscha dovria nagina per sa participar ad in curs.

La tur da glatsch vegn manada da l’uniun Vertical Walking. Ella ha otg commembers. Quels organiseschan mintgamai ils curs da raiver che pon vegnir visitads da persunas fittas che n’han nagina tema da l'autezza. Per garantir la segirtad, vegnan las participantas ed ils participants segirads cun ina suga.

video
Tur da raiver glatsch a Savognin
Or da RTR Social dals 22.02.2022.
abspielen. Laufzeit 2 minutas 36 Sekunden.

RTR actualitad 17:00

Artitgels legids il pli savens

Scrollar a sanestra Scrollar a dretga