Siglir tar il cuntegn

Header

Luzi Thomann (sanester) surpiglia il presidi da Daniel Fischer.
Legenda: Luzi Thomann (sanester) surpiglia il presidi da Daniel Fischer. RTR, Federico Belotti
cuntegn

Grischun Central Savognin Turissem ha in nov president

Luzi Thomann da Parsonz è vegnì elegì oz sco nov president da la Tourismus Savognin Bivio Albula AG. El remplazza Daniel Fischer ch’ha presidià la societad anonima dapi che quella è vegnida fundada il matg da l’onn passà.

Suenter lavurs preparativas vastas aveva l’expert da turissem Daniel Fischer sa mussà pront en la fasa da start da surpigliar il presidi. Ussa saja questa fasa da svilup terminada cun success, ha ditg Daniel Fischer envers RTR. Il nov elegì president Luzi Thomann sa legra sin la nova sfida «Jau ma legrel, da nizzegiar l’atmosfera da partenza per la fasa da realisaziun e da nizzegiar la strategia elavurada», ha ditg Luzi Thomann.

Societad anonima ha cuntanschì intginas finamiras

15 mais suenter che la societad anonima è vegnida fundada, datti gia emprims resultats. Uschia è la finanziaziun garantida, la strategia 2018 – 2021 è decidida, ed ina squadra dad indesch collavuraturas e collavuraturs lavura intensiv vi da divers projects, scriva la Tourismus Savognin Bivio Albula AG en ina communicaziun.

Daniel Fischer ha annunzià sia demissiun a la radunanza generala.
Legenda: Daniel Fischer ha annunzià sia demissiun a la radunanza generala. RTR, Federico Belotti

RR novitads 18:00