Savognin - Veia d’Alp serrada pervi da crudada da crappa

Sco quai che Ralph In-Albon, il selvicultur dal servetsch forestal ha ditg sin dumonda, vegnia ussa ina firma incumbensada cun la reparatura dal mir. El quinta e spera che la via possia puspè vegnir averta l’entschatta d’avust. Per vehichels forestals pli pitschens e quads èsi pussaivel da nizzegiar in sviament – quel pon era peduns duvrar. En consequenza da la serrada da la Veia d’Alp, po il bus turistic per viandants e velocipedists per il mument betg cursar sin quest traject.

Via serrada accessibla sin dumonda

En cas excepziunals motivads èsi permess da duvrar era la via serrada. Quai dentant mo en cunvegna precedenta cun il servetsch forestal. Charrar sin la via serrada succeda – er suenter avair consultà il servetsch forestal – exclusivamain sin agen ristg. La vischnanca refusa mintga responsabladad per donns da persunas e da material, scriva la vischnanca da Surses en ina communicaziun.