Siglir tar il cuntegn

Header

audio
Ina visita en la scola da skis a Savognin
Or da Actualitad dals 17.01.2024. Maletg: RTR
laschar ir. Durada: 4 minutas 28 Secundas.
cuntegn

Scola da skis Savognin Sin pista cun ils pli pitschens

L'entschatta da l'onn è mintgamai il temp da las emnas da skis da las scolas e scolinas. Quai è er il cas quest'emna tar l'emprima e segunda scolina da Surses. Ma betg mo las scolarinas e scolarins èn da viadi quest emna sin las pistas dal territori da skis d'uffants La Nars a Savognin. RTR ha fatg ina visita tar la scola da skis.

Las emprimas scolastas e scolasts da skis en lur dress cotschens èn sa rimnadas en il tschaler da la scola da skis da Savognin. Per sa preparar e far pront il material per ils posts or en la naiv. La prognosa da l'aura sin il telefonin mussa «Savognin: -6 grads» ma i spetga in di sulegliv. 

Las 9:30 vegnan las emprimas mammas e babs cun lur uffants. Per ch'ils radund 40 scolarets e scolarettas san nua spetgar, datti tar il lieu d'entupada per mintga scolasta e scolast ina tavla cun si in animal. E cura che tut ils skis èn montads e mintgin ha survegnì in bindel da colur per parter en las gruppas, vai per las duas gruppas cun ils uffants in pau pli versads en direcziun territori da skis Tigignas. Las autras tschintg gruppas van en direcziun La Nars, il territori da skis per uffants. Arrivads a La Nars vai tras in tunnel cotschen cun il tarpun magic enfin sisum il mot, nua che i dat las emprimas instrucziuns.

Ma betg mo la scolina è sin ils skis quel avantmezdi

Tar ina pitschna collina tranter la scola da skis e La Nars è sa rimnada ina pitschna gruppa da skiunzas e skiunz tranter dus e mez e tschintg onns. Qua è tut anc in pau pli ludic che tar la scolina. Las duas scolastas preparan in parcours cun animals da plesch, nua ch'ils pli pitschens pon far lur emprimas emprovas. 

Skischule Savognin Skiwoche Kindergarten Surses
Legenda: Il «parcours da zoo». RTR

Turnain a La Nars tar la scolina. Suenter ina curta pausa cun tè chaud per sa stgaudar vai enavant cun trenar da far stortas. Ina da las set gruppas da la scolina sa differenziescha detg da las autras. Trais mats stattan sin aissas empè da skis. La purschida d'ir cun aissa tar l'emna da skis da la scolina datti quest onn per l’emprima giada, declera il manader da la scola da skis Lothar Künzli.

Vers mezdi sa legran ils uffants sin in bun gentar. Sin via tar il Club da Pinocchio, nua ch’i dat pasta cun sosa da tomatas, raquintan las duas scolarettas da 6 e 7 onns, Sina e Shayenne tge che ha plaschì ad ellas il meglier enfin ussa: il ir spert, far stortas ed il avair bel l’in cun l’autra.

Skischule Savognin Skiwoche Kindergarten Surses
Legenda: Shayenne e Sina han plaschair vid l'emna da skis. RTR

E cura ch'ils uffants han tancà avunda forza ed energia vai puspè enavos sin pista.

audio
Il dretg mument da cumenzar ad ir cun skis cun uffants
ord Actualitad dals 17.01.2024. Maletg: RTR
laschar ir. Durada: 3 minutas 7 Secundas.

Cura è mes uffant pront per ir cun skis?

Avrir la box Serrar la box
Legenda: Giuliana Casparin dat scola da skis als pli pitschens. RTR

Giuliana Casparin fa quest onn sia 27avla stagiun sco scolasta da skis. Cun in surrir manegia ella da sasez ch'ella tutga gia quasi tar l’inventari da la scola da skis da Savognin. Uschia n’èsi betg da sa smirvegliar ch’er l'in u l'autra collega da team ha emprendì l’ir cun skis tar ella.

Entras sia vasta experientscha sa ella er sco ch’ins senta sco mamma u bab cura ch'il agen uffant è pront per far las emprimas emprovas sin la naiv.

RTR actualitad 07:00

Artitgels legids il pli savens