La chasa da scola da Savognin è vegnida en ils onns. Il bajetg construì il 1954 na correspunda betg pli ad ina scola moderna. Ils passa 100 uffants da la scola primara e scolina duessan survegnir ina nova scola. Cura e nua n'è dentant anc insumma betg cler.
L'atun da l'onn passà ha il cumin da Surses preschentà a la magistraglia in'emprima skizza. «Las reacziuns dals scolasts e da las scolastas èn stadas criticas envers il preschentà» ha il president communal Leo Thomann ditg vers RTR. I saja vegnì mess en dumonda il lieu en general, il memia pitschen dumber da stanzas da scola ed auter pli.
Sin fundament da quellas emprimas reacziuns haja la vischnanca decidì dad elavurar alternativas. Construir sin il prà verd saja dentant combinà segiramain cun dapli custs ed er cun grond segns da dumonda sco per exempel la midada da zona u insumma la pussaivladad da sulom disponibel, ha Thomann ditg enavant. Cler saja a tuts ch'i stoppia dar proximamain ina soluziun per ina nova chasa da scola.