Scumond da fotografar a Bravuogn ha consequenzas giuridicas

Il scumond da fotografar a Bravuogn ha consequenzas giuridicas. Cunter il scumond da fotografar decis da la radunanza communala da Bravuogn la fin da matg da quest onn hai dà trais recurs.

Ina da las reclamaziuns cunter il scumond da fotografar a Bravuogn resta. Bild in Lightbox öffnen.

Legenda da maletgs: Ina da las reclamaziuns cunter il scumond da fotografar a Bravuogn resta. RTR, Linus Livers

Dus dals trais recurs èn puspè vegnidas retratgas, ha Georg Aliesch il manader da la surveglianza chantunala da vischnancas confermà sin dumonda da l’agentura da novitads sda. Il recurs che resta duai sclerir sch’il scumond da fotografar ha cuntrafatg al dretg surordinà. Tgi che vegn a tractar la reclamaziun n’è anc betg cler. Tenor Aliesch pudess quai esser la regenza chantunala u la dretgira administrativa.

Dapli pernottaziuns?

Ils bels maletgs da Bravuogn èn ids enturn il mund aifer paucs dis. Quest'acziun da marketing saja dada en egl en l'entir mund, resumescha la vischnanca. Sche l’acziun ha dentant procurà per dapli pernottaziuns n’è il mument anc betg propi cler. Il mument na dettia quai naginas cifras concretas, ha ditg Marc-Andrea Barandun il manader da turissem Bravuogn-Filisur.

RR novitads 16:00