Siglir tar il cuntegn

Header

video
Rets cunter romans: Novas scuvertas en il Surses
Or da Telesguard dals 04.11.2021.
laschar ir. Durada: 4 minutas 55 Secundas.
cuntegn

Scuvertas archeologicas Crap Ses – chattà artefacts romans

En il rom dal project archeologic Cumbat han var 30 studentas e students da l'universitad da Basilea tschertgà sistematicamain artefacts dal temp roman en la stretga Crap Ses tranter Casti e Cunter. E gì dapli success che spetgà.

500 capanegals e 200 projectils da plum

En in territori da 500 meters largezza, cun guaud e cleragls, han las studentas ed ils students chattà radund 500 capanegals da sandalas romanas e var 200 projectils da plum. Quels projectils sajettavan ils schuldads romans cun schlingias, uschia che quels sgulavan cun var 200 km/h tras l’aria. Ils plums chattads portan in pitschen bul, il simbol da la 12avla legiun. Questa emprima tschertga sistematica d'artefacts è stada mez settember.

Emprim champ da battaglia roman

Grazia a quellas scuvertas e tenor emprimas retschertgas crajan ils archeologs ch'igl haja dà en la chavorgia Crap Ses in cumbat tranter legiuns romanas è truppas reticas. Quai en il rom da la campagna militara tras las Alps ch'è vegnida lantschada l’onn 15 a.C. da l'emprim imperatur roman, numnadamain l’imperatur Augustus. Sche quella supposiziun vegn en il decurs dal project confermada, lura fiss quai l’emprim champ da battaglia roman sin territori svizzer.

audio
Chat da romans d'avant 2000 onns en il Surses
ord Actualitad dals 04.11.2021.
laschar ir. Durada: 3 minutas 29 Secundas.

Lantschà grazia ad ina scuverta extraordinaria

Il project Cumbat è vegni lantschà dal Servetsch archeologic dal chantun Grischun. Quai grazia ad ina scuverta d'in stilet roman – ina scuverta fitg preziusa. Il stilet ch'il hobi-archeolog Lucas Schmid da Glion ha chattà avant dus onns e mez è vegnì preparà minuziusamain d’ina restauratura chantunala. Stilets da quest gener èn vegnids chattads mo fitg, fitg paucs. Quella scuverta ha dà il stausch, per lantschar il project scientific Cumbat. Il project cuzza tschintg onns e custa in mez milliun francs. Il 2025 è planisada in’exposiziun cun tut ils objects chattads en la chavorgia Crap Ses

RTR Telesguard 17:40

Artitgels legids il pli savens