Siglir tar il cuntegn

Header

audio
La serenera convenziunala da Ziràn
Or da Actualitad dals 07.09.2021.
laschar ir. Durada: 03:15 minutas.
cuntegn

Serenera Val Schons a Ziràn Visita tar il survegliader da serenera Johannes Mani

Gai bunamain 30 onns è Johannes Mani da Pignia survegliader da serenera a Ziràn. El ha mussà ils differents pass ch'èn necessaris enfin che l'aua persa è schubergiada e declarà tge lavurs ch'el fa.

Entschet a luvrar en l'ARA Val Schons ha Johannes Mani 1992 cura ch'il manaschi n'era anc betga dal tut construì a fin. L'onn 1993 è la serenera vegnida messa en funcziun. Quella nova sfida professiunala era per el la pussaivladad da betg pli stuair lavurar en il guaud. Quai saja vegnì in zic streng ed el haja survegnì problems cun il dies.

La lavur en la serenera e fitg varianta. I dat lavurs da mecanist, electricist, analisas en il labor, lavur da biro ed era ina massa da schubergiar. Quella variaziun e quai che ma plascha anc oz suenter bunamain 30 onns vid mia professiun
Autur: Johannes Mani survegliader da serenera

Nagin emprendissadi classic

Per la professiun dal survegliader da serenera na datti nagin emprendissadi classic. Sco emprim ston ins avair la plazza tar l'ARA e lura datti differents moduls da scolaziun che cuzzan mintgamai in'emna. Là vegnan las differentas cumpetenzas per la lavur en la serenera acquistadas. La scolaziun specifica vegn organisada da l'Associaziun dals professiunists da la protecziun da las auas (VSA) per l'entira Svizra. Ins n'è betg obligà da far tut ils moduls. Tgi che fa tut ils moduls e passa l'examen final dastga sa numnar spezialist da sereneras cun diplom federal (eidgenössisch diplomierter Klärfachmann).

Nettegiada en plirs pass

La via da l'aua tras la serenera ha plirs pass. L'emprim stgalim è la nettegiada mecanica. Ina rastelera prenda or las restanzas grondas a groppas, suenter va l'aua tras in cul che tegna enavos ils chavels ch'èn en l'aua. Quest pass saja fitg impurtant per che las pumpas na vegnian betg stuppadas. Tar il proxim pass mecanic sto l'aua ruassar per che la substanzas grevas possian sa sbassar e las substanzas levas sa rimnian a la surfatscha. Ieli e grass da la cuschina e dal lavar giu sa nodan era a la surfatscha. Quella uschenumnada glitta da serenera vegn allontanada da l'aua.

Jau hai gia chattà ina massa chaussas en la rastelera: pusada, termagls e vestgadira. Ina giada m'ha telefonà in miedi perquai ch'in pazient haja derschì sia protesa da dents en la tualetta. Quels n'hai jau dentant betg chattà.
Autur: Johannes Mani survegliader da serenera
Miniera ARA Val Schons
Legenda: Miniera ARA Val Schons Tut quellas chaussas ha Johannes Mani chattà en la rastelera da la serenera. Johannes Mani

Suenter il pass mecanic suonda il pass biologic. Qua vegnan las substanzas dissolvidas en l'aua decumponidas cun micro-organissems e bacterias. Quels organissems biologics che sa nutreschan da las substanzas en l'aua persa drovan oxigen per puder viver. Cun ina pumpa vegn l'oxigen aschunta en il fossal da serenar. En il proxim fossal sto l'aua puspè pussar. Impurtant è da tenair l'equiliber en ils dus fossals cun ils micro-organissems e controllar ch'igl haja avunda e las endretgas bacterias en l'aua. Sco davos pass vegn retratg il fosfat or da l'aua. Perquai ch'ils micro-organissems na pon betg decumponer avunda il fosfat, vegn aschuntà il uschenumnà «Fällmittel» per il process chemic.

Producziun da biogas

Avrir la box Serrar la box

Cun las restanzas e la glietta da serenera producescha l'ARA Val Schons biogas en ina smarschera. Per quel process dovran els er ieli da brassar d'hotels e restaurants e vanzadiras da la cascharia ad Andeer.

Sur la mesadad da l'energia che la serenera drova vegn producida sez.

RTR actualitad 08:00

Artitgels legids il pli savens

Scrollar a sanestra Scrollar a dretga