Cura che Simona Demarmels va a spass cun ses chaun è quai dapli che mo ina spassegiada, quai è gist er ina lecziun da scola. La dunna da 30 onns ch'è oriunda da Salouf passenta oz ses mintgadi cun esser scolasta da chauns.
Enfin la stad passada eran ses scolars e scolaras anc ils uffants da l’emprima e segunda classa a Lantsch. Suenter avair fatg la scola auta da pedagogia a Cuira ha ella gì cumenzà questa plazza cun gronda motivaziun e dà sis onns scola. Insacura ha ella sentì ch’insatge na consteva betg.
Ella era fitg stancla las sairas e spetgava be da vacanzas tar vacanzas. Ils motivs èn stads differents: Classas dublas, bleras scolaras e scolars, memia pauc temp per mintga singul, quai ha frustrà la giuvna scolasta. Suenter adina puspè empruvar da sa motivar ed er avair pli pitschnas classas, ha ella tuttina stuì trair in stritg e chalar.
Il siemi da daventar scolasta, lez haja ella gia gì sco scolara en la scola primara a Salouf.
Mes conturn scheva adina: «Quai è ina buna lavur, buna paja, bleras vacanzas.» Cun quest sustegn sun jau stada persvadida da far in bun mastergn.
Ma dar scola ozendi è in zichel auter ch’avant 20 onns. La scola è vegnida pli cumplexa, sper la lecziun cun ils uffants datti anc bler d’organisar e da communitgar. Suenter il dar scola èsi da curreger, planisar, telefonar cun geniturs e da far sesidas, in di da lavur da 10 uras na saja betg in’excepziun.
En quels sis onns ha Simona fatg intginas experientschas, ina da quellas è d’esser fitg stricta cun la communicaziun e da betg adina stuair esser cuntanschibla. In da ses tips a giuvens scolasts u scolastas:
D'avair in telefonin separat, ch’ins metta era or. Sch’ins di ch’ins metta or el la saira da las 5, lura mettan ins er or el la saira da las 5.
Sin la dumonda co ch’il mastergn da magister stuess esser manegia l’anteriura scolasta ch’i fiss d’avantatg da pudair dar en in team da dus scola ed avair persunas cun savidas psicologicas e socialas en il team, quai levgias la lavur dals scolasts e las scolastas.
Simona Demarmels è cuntenta d’avair fatg la midada. Scolasta gliez resta ella perquai tuttina, dentant cun pli pac d’organisar ed administrar, persuenter ha ella uss dapli plaschair e libertads.
