I saja gartegià da passiunar ils giuvens da sa participar en la SIA, ha ditg Stefan Cadosch ch’è architect a Turitg ed è oriund d’Alvaschagn. Surtut saja reussì da cuntanscher in per impurtants success politics sin stgalim naziunal. Dasperas devi era istorgias da success, sco per exempel la realisaziun da la punt da miracla «Wunderbrücke» en il Technorama.
Giubileum sco punct culminant
In dals puncts culminants dals davos nov onns ch’el haja gì saja stà il giubileum da 175 onns da la SIA l’onn 2012, nua ch’era la cussegliera federala da lez temp Doris Leuthard era sa participada.
Dapli temp per famiglia e l'architectura
En l’avegnir vul Stefan Cadosch puspè sa deditgar dapli a ses biro d’architectura ch’el maina cun in partenari a Turitg. «Segir vuless jau simplamain puspè planisar e tgirar construcziuns dad A enfin Z en quietezza ed investir bler dapli forza en il svilup da novas ideas», ha el ditg. Dasperas veglia el duvrar enavant quai ch’el haja emprendì tut quels onns, per exempel cun schlargiar ses mandats universitars, u cun surpigliar mandats en giurias da concurrenzas. Era veglia el gidar tar giuvens Start-Ups en il rom da l’architectura, per che quels possian purtar lur custaivels products a la fiera. Surtut s’allegra Stefan Cadosch però sin dapli temp per amis e famiglia.
Successiun è gia reglada
Sco quai che Stefan Cadosch ha ditg, saja sia successiun gia reglada. Il nov president da la SIA vegnia preschentà ed elegì ils 23 d'avrigl 2021 en il rom da la radunanza da delegads. La SIA ha diversas incumbensas. Tranter auter è ella responsabla per l'ovra da normas da bajegiar e la scolaziun e furmaziun d'architects ed inschigners. La SIA cusseglia era il Cussegl federal en dumondas da construcziun.