Las uniuns da la protecziun da l'ambient han specialmain crititgà ch'ins stuess runcar guaud per realisar il project cun las duas punts pendentas da 120 e 240 meters. Il medem mument han la Fundaziun svizra per la protecziun da la cuntrada e l'uniun Mountain Wilderness era fatg recurs cunter la decisiun dal chantun d’avant dus onns. Quel aveva approvà la revisiun parziala dal territori da la vischnanca Alvra/Albula per insumma pudair realisar il project turistic. Gist questa revisiun n'avess il chantun però betg dastgà acceptar tenor la dretgira. Pertutgada fiss era la protecziun d’aua e la protecziun da monuments, cunquai ch'il project fiss er datiers da la lingia da tren ed uschia dal patrimoni cultural da l’UNESCO.
Sche la vischnanca tira vinavant la decisiun tar la proxima instanza, n'è anc betg cler. Ils responsabels n'èn betg stads cuntanschibels per RTR.
