Siglir tar il cuntegn

Header

Navigaziun

cuntegn

Grischun Central Spital Tusaun vul fusiunar cun Spitex Viamala

La fusiun duai ir en vigur il prim da schaner 2020. Ils dus partenaris vulan nizzegiar sinergias ed en l’avegnir spargnar custs. A lunga vista saja en vista in potenzial da spargn da radund 100’000 francs ad onn, han ils responsabels da la spitex ed il spital Tusaun ditg sin dumonda da RTR.

Da san.: Roman Stäbler, manader Spitex Viamala; Johannes Pfenninger, president Spitex Viamala; Curdin Capaul, president Spital Tusaun; Reto Keller, directur spital Tusaun - a la radunanza da delegads dal spital Tusaun da venderdi passà.
Legenda: Da san.: Roman Stäbler, manader Spitex Viamala; Johannes Pfenninger, president Spitex Viamala; Curdin Capaul, president spital Tusaun; Reto Keller, directur spital Tusaun - a la radunanza da delegads dal spital Tusaun. RTR, Federico Belotti

En ina communicaziun a las medias scriva il spital da Tusaun ch’il provediment en il sectur da sanadad saja en in ambient difficil per fatschentas che lavuran sur sasezzas. Cun la fusiun veglia ins optimar sinergias e custs. Per ils pazients, ils clients ed ils confamigliars duai quai en l’avegnir esser mo pli ina persuna da contact per las prestaziuns ambulantas e staziunaras. Impurtanta saja era la vista dals lavurants. En ils dus manaschis lavurian 250 persunas. Sco emploiader ferm cun bleras plazzas da furmaziun veglia ins esser attractiv sin il martgà da lavur ch’ha blera concurrenza.

Naginas relaschadas

La fusiun duai succeder cun transferir la facultad da l’uniun Spitex Viamala a la fundaziun Spital Tusaun. Ils contracts da lavur existents duain valair era suenter la fusiun. Per las vischnancas na dettia betg grondas midadas. La cunvegna da prestaziun pertutgant la finanziaziun duai exister vinavant. La decisiun da fusiun dals dus manaschis è planisada ils 22 d’avust da quest onn, ed il start operativ è planisà sin l’entschatta da l’auter onn.

RR novitads 17:00