I saja stada ina stagiun prefecta, la finiziun da stagiun andetga frainia dentant in pau il fitg bun resultat, ha ditg Franco Quinter, il president dal cussegl d’administraziun dallas Pendicularas da Spleia Tambo SA. Era sche las cifras definitivas manchian il mument, sajan els tut en tut cuntent cun la stagiun d’enviern, perquai ch’il schaner ed il favrer sajan stads dus fitg buns mais. Ma las dus emnas che manchian il mars vegnian schon ad avair effect negativ. Malgrà che l’interpresa cumbatta gia plirs onns cun las finanzas saja la proxima stagiun d’enviern garantida. In concurs na saja il mument nagin tema, ha ditg Franco Quinter. Las cifras definitivas da l’onn da fatschenta current vegnan preschentadas a la radunanza generala ch’ha lieu probabel l’avust u il settember.
Pendicularas surpiglian scola da skis e campadi
Las incumbensas tranter Viamala Turissem e la vischnanca da Valragn vegnan structuradas da nov, scriva la vischnanca en ina communicaziun. L’impuls saja vegnì da Viamala Turissem, che veglia en l’avegnir sa focussar sin las incumbensas da basa tenor la cunvegna da prestaziun. Quai vul dir che l’organisaziun turistica dat giu tschertas incumbensas da Spleia. In per incumbensas surpiglian las Pendicularas da Spleia Tambo SA. Uschia èn ellas a partir da la proxima stagiun d’enviern da nov responsablas per la scola da skis ed il campadi da Spleia. Plinavant surpiglian las pendicularas l’organisaziun da tschertas occurrenzas, sco per exempel aperos da giasts u la fiera dal december a Spleia.
