Sco quai che la vischnanca da Valragn scriva en il messadi per la votaziun dals 10 da december, na saja la situaziun finanziala da las pendicularas betg buna. Era en buns onns da fatschenta na saja betg pussaivel d’amortisar debits u d’investir ord atgna forza en l’infrastructura. Cun in pachet da diversas mesiras duessan las Pendicularas da Spleia Tambo SA vegnir or da la crisa.
Differentas mesiras per vegnir ord la crisa
Per sanar las finanzas da las pendicularas duessi dar dus augments dal chapital d’aczias en la valur da 3,8 milliuns francs. En l’emprima duess la vischnanca da Valragn desister da sias pretensiuns envers las pendicularas, quellas duain vegnir midadas en chapital d’aczias. Supplementar cumprass la vischnanca aczias en la valur da 98’680 francs. En in segund augment dal chapital d’aczias vegnan dus investurs mintgamai a sa participar cun total 1,4 milliuns francs. Tranter auter vegn quai cumpensà cun emprests existents. Sche tut va tenor plan duess la vischnanca da nov posseder 28% da las aczias, ils dus investurs mintgamai 28%. 16% da las aczias fissan tar vischnancas da la regiun, vischnancas burgaisas e tar firmas e privats.
Per pudair sviluppar vinavant il turissem duessan en l’avegnir vegnir creads novs letgs chauds. Per quest intent duess vegnir creada ina nova zona da turissem, hotel, abitadi e campadi. Las parcellas previsas sa chattan tranter l’autostrada e la staziun da val da la pendiculara da Spleia. Per cumpensar parzialmain la perdita da terren agricul, duess il territori enturn il campadi actual vegnir transfurmada en terren agricul. Perquai che las parcellas na cumpensassan betg dal tut la nova zona planisada, vul la vischnanca metter a disposiziun 100’000 francs per ils purs. Quels daners duessan vegnir duvrads per infrastructura agricula e per valurisar pastgiras.
Plinavant duai vegnir fundada ina societad da svilup. Quella duess en l’avegnir pudair realisar novs projects, sco per exempel in ressort da vacanzas. Vi da la societad duessan tranter auter sa participar ils dus investurs e la vischnanca da Valragn.