Regula Battaglia è fundatura dal club, bun'olma, motor e la «scheffa» betg mo da ses chaun. Avant 15 onns ha ella fundà il club «Agility Viamala» – in'uniun che s'engascha per il sport da chauns. Il punct da partenza sajan stads set giuvenils motivads che vulevan far concurrenzas cun lur chauns. Ella haja nizzegià la chaschun e fundà il club. Ussa dumbra il club 80 commembers e 60 sajan activs. E mo uschia saja ina vita d'uniun activa insumma pussaivla, tradescha Regula Battaglia ch'è la bun'olma dal club.
Sco manadra tecnica ha Regula Battaglia la survista da quai che curra e passa. Ella saja eba ina persuna adina plain ideas ed uschia saja la vita d'uniun er fitg dinamica. Ma senza tut ils commembers engaschads na saja il club er betg dapli ch'in club sco tut ils auters era.
Integrar giuventetgna ed organisar concurrenzas
E per garantir ina cuntinuaziun è la manadra tecnica gia ussa vi d'integrar persunas giuvnas en suprastanza e sco manaders ni manadras da gruppa. «Agility Viamala» è, quai mussa in sguard sin la homepage, in club cun success e fitg activ. Ussa dumengia organiseschan els per exempel il Campiunadi svizzer da giuventetgna en la disciplina Rule.