Il retard haja da far cun las lavurs da la vart da Preda, di Paul Loser, il manader dal project dal tunnel nov da l’Alvra. Sfratgar ora il crap dal tip «Plattì da l’Allgäu» sin ina lunghezza da 1,2 kilometers datiers da Preda saja stà pli difficil che spetgà, uschia ch’ins haja ussa in retard da plirs mais. Avert duess il nov tunnel vegnir l’emprima mesadad dal 2022, tge mais exact na possia el il mument betg anc dir.
Da 7,3 milliuns sin 350 milliuns
Avant 117 onns ha il project dal tunnel da l’Alvra custà 7,2 milliuns – ina gronda summa per lezzas uras. Uss è il project dal nov tunnel da l’Alvra budgetà cun 350 milliuns francs. Malgrà il retard da las lavurs quinta la Viafier retica da restar en la dimensiun da questa summa.
2014 è la badigliada capitada. Lura han las lavurs cumenzà ed ils 2 d’october 2018 è la perfuraziun gartegiada. Uss èn ils lavurers vid l’entulada d'il palantschin e la finamira è d’esser a fin cun la construcziun brutta enfin december 2020. L’onn suenter duessan tut las installaziuns tecnicas da la viafier vegnir installadas che tut è pront sin l’avertura. Il vegl tunnel vegn lura bajegià enturn en in tunnel da segirtad. L’entir project duai esser a fin l’onn 2024.
Qua sin il plazzal lavura nagin Svizzer sco minier
Ils umens che lavuran en il tunnel èn dumandads. Sulettamain 10 grads èsi en il tunnel e plirs centimeters aua che curran atras. Ils blers lavurers èn da l’Austria e l’Italia.
Di da las portas avertas
Sonda ils 31 d'avust datti in di da las portas avertas sin il plazzal dal tunnel a Preda. Tranter las 08:40 e las 16:00 datti mintga 20 minutas excursiuns che cuzzan mintgamai 90 minutas.
RR novitads 17:00
