Sco quai ch’ils gestiunaris da la butia d’enfin qua han ditg envers RTR, èn els leds, che la butia haja in avegnir. Quai na sa chapescha betg da sasez en ils dis dad oz. Ins haja adina pudì serrar giu l’onn cun almain ina nulla naira. Quai saja mo grategià grazia a la clientella fidaivla ed il sustegn da la vischnanca Albula/Alvra, han ditg ils gestiunaris partents dal Centerin da Scuntrada. La midada succeda perquai che Hans Friberg è en la vegliadetgna da pensiun e vul avair dapli temp per sia famiglia.
Plaschair da la nova sfida
Roman Brenn, il president dal Consum Alvra-Surses ha ditg, ch’els sa legrian sin la nova sfida da manar la butia a Stierva. Gist per in vitg sco Stierva saja enorm impurtant da pudair offrir in lieu da scuntrada cun butia, café e posta. Grazia ad il sustegn da la vischnanca che porscha ina garanzia da deficit da 20’000 francs spera Brenn, da pudair manar la butia vinavant cun success. Il contract valia per trais onns, suenter vegnia analisà co ch’ils affars sajan marschads. Da subvenziunar la butia per exempel cun il gudogn da Casti (Top Shop cun tancadi), na saja però betg l’idea. Mintga butia stoppia purtar sasez, uschia il president dal Consum Alvra-Surses.
Novs gestiunaris il 2023
La midada da gestiun succeda sin la fin da l’onn. La primavaira datti anc ina renovaziun, tranter auter datti era midadas tar l’infrastructura dal servetsch da la posta.