Siglir tar il cuntegn

Header

cuntegn

Stierva/Ziteil Suprastanza dal cumin-baselgia visescha contract cun plevon

Gia 20 onns è il plevon Paul Schlienger en uffizi sco plevon e custodi da Ziteil, il lieu pelegrinadi. Questa stad vegnia dentant a dar ina midada: Paul Schlienger ha survegnì la desditga sco plevon en val d’Alvra. Sch’el sa pratitgar vinavant sco custodi a Ziteil, è per il mument era intschert.

Suenter lungas ponderaziuns hajan la vischnanca da plaiv Alvra e Brinzauls decidì da schliar la relaziun da lavur cun il plevon Paul Schlinger da Stierva. Quai scriva il vicari general dal Grischun Andreas Fuchs en il fegl parochial Grischun. Il vicari agiunta ch’el s’engaschia da chattar in nov pensum per il plevon e che pussibiliteschia ad el da tgirar era en l’avegnir Maria Ziteil. E gist Ziteil è la raschun per la desditga al plevon.

Pervi da Ziteil ha il plevon nagina peda per ils auters

Perquai ch’il plevon Paul Schlienger saja durant il matg enfin l’october occupà ferm cun Ziteil, resta pauca peda per tgirar la Val d’Alvra, scriva il vicari Andreas Fuchs. Perquai haja il plevon Paul Schlienger la stad passada decidì da far messas mo pli a Mon, Stierva, Casti ed Alvaschagn – e betg pli en l’entira val Alvra sco avant. Las duas plaivs da la val Alvra giavischassan però in plevon ch’è responsabel per l’entira val Alvra, e betg mo per ina part da la val. Il fatg, ch’i vegnia ussa puspè differenzià tranter la val Alvra davant e la val Alvra davos , fetschia greva la collavuraziun cun il plevon. Ed ussa ha el survegnì la desditga sin la stad da quest onn.

In plevon conservativ

Probabel datti anc autras raschuns per la desditga. Diversas persunas han ditg envers RTR ch’il plevon saja in fitg conservativ, che na lubeschia per exempel betg da pigliar l’urna en baselgia tar sepulturas.

Tuts taschan

Envers RTR na vuleva il plevon per il mument betg pigliar posiziun pervi da sia desditga. El ha sulettamain menziunà che la communicaziun da l’uvestgieu da Cuira na constettia betg dal tut. Tar la plaiv Alvra ins n'è era betg pli communicativ. Deplorablamain na possian ins betg dir dapli che quai ch’i stettia scrit en la communicaziun dal vicari general Andreas Fuchs. Medema è la resposta dal post da medias da l’uvestgieu: Nus na communitgain betg dapli che quai ch’i stat scrit en la communicaziun dal fegl parochial, scriva il pledader Giuseppe Gracia.

RTR actualitad 17:00

Artitgels legids il pli savens

Ir a sanester Ir a dretg