Siglir tar il cuntegn

Header

En il territori da skis da Spleia cun vista sin il Piz Tambo.
Legenda: En il territori da skis da Spleia cun vista sin il Piz Tambo. RTR, F. Belotti
cuntegn

Grischun Central Strategia Spleia 2025 prevesa dapli letgs chauds

Las Pendicularas da Spleia Tambo SA han preschentà a la populaziun il venderdi saira lur strategia per l’avegnir. Ils trais puncts principals èn: Meglierar la situaziun finanziala, augmentar l’utilisaziun dals implants e stgaffir cooperaziuns.

Silvio Catrina, il president dal cussegl d'administraziun da las Pendicularas Spleia-Tambo SA.
Legenda: Silvio Catrina, il president dal cussegl d'administraziun da las Pendicularas Spleia-Tambo SA. RTR, Federico Belotti

Cun in augment dal chapital d’aczias da 1,3 milliuns sin 3,9 milliuns francs duai la liquiditad vegnir segirada e las cundiziuns da tschains cun las bancas duain uschia vegnir meglieradas. Quai ha ditg Silvio Catrina, il president dal cussegl d'administraziun da las Pendicularas Spleia-Tambo SA. Plinavant duai la producziun da far naiv artifiziala vegnir surdada ad ina «Finanz-Infra», ina societad nova che duai vegnir fundada cun participaziun da las vischnancas.

Collavuraziun cun l'armada e cun San Bernardino

Per carmalar dapli glieud sin las pistas marschan actualmain discussiuns cun l’armada Svizra. L’idea è da construir in alloschi per gruppas, che po vegnir duvrà l’enviern da sportists d’enviern, e l’ulteriur temp da l’armada. Ina decisiun da l’armada saja en vista il november.

Sco ulteriura mesira per carmalar dapli giasts sin las pistas duai vegnir intensivada la collavuraziun cun San Bernardino. Las pendicularas da Spleia èn da l’avis, ch’ins pudess nizzegiar meglier il potenzial cun offertas da pernottar a San Bernardino, ed ir cun skis a Spleia.

RR actualitad 08:00