Nus giain envers ina pussaivla mancanza d’electricitad. Per meglierar e garantir che nus avain avunda electricitad era l'enviern, ha la maisa radunda da la cussegliera federala Simonetta Sommaruga, cun exponents da chantuns, ovras electricas ed organisaziuns da la natira, decidì da lavurar vi da 15 projects d’ovras idraulicas. Ina da las ideas fiss d'auzar il mir da fermada dal lai da fermada a Marmorera per 14 meters. Quai augmentass la producziun d’electricitad per 50%. Il project custass tenor l’EWZ 100 fin 200 milliuns francs. Las ovras electricas da la citad da Turitg (EWZ) èn proprietarias da las ovras, han però pauc gust da lavurar vida quest project.
Simplamain mo uschia na vegn betg investì.
Il motiv: Il 2035 scroda la concessiun e tut turna puspè al proprietari («Heimfall»). Quai munta che las ovras van automaticamein enavos a la vischnanca da Surses ed al chantun. Il chantun ha lura da pajar sulet 20% da la valur da las ovras a la possessura – l’EWZ. Tenor la «strategia chantunala concernent la forza idraulica» dal Grischun, na vul ins betg prolungar la concessiun.
L’EWZ prolungass dentant il pli gugent puspè ella. E lura auzassan els era il mir da Marmorera. Sch’els investissan dentant gia uss en quest project, lura stuessan els contractar cun il Grischun e decider, quant da quests novs custs ch’il chantun stuess lura surpigliar.
Sch’ins guarda sin il stan da lavur da quest’idea da l’EWZ al lai da fermada Marmorera, lura è quai enfin ussa mo in intent. I n'exista gnanc ina skizza pli concreta. Las stimas dals custs da producziun van tranter 100 e 200 milliuns – pia insuma nagut concret.
L’EWZ è irritada: Cunzunt, cura ch'il chantun aveva preschentà la nova strategia en il Cussegl grond il favrer 2022. Cun 107 vuschs e senza cuntravuschs aveva lez prendì per enconuschientscha questa.
Daco ch’ils da Turitg èn permalads na poss jau betg propi chapir. Dapi decennis san els che la concessiun va a fin il 2035.
Cun questas premissas vesi ora mal per quest project a Marmorera. Sche nagin project concret è sin maisa, lura èsi difficil da contractar per il chantun. Da l’autra vart: Sch’il mir na tutga bainbaud betg pli a l’EWZ, lura èsi grev da propi sviluppar in project.
