Siglir tar il cuntegn

Header

cuntegn

Stugl/Bravuogn Vischnanca vul collavurar cun petiziunaris

La vischnanca da Bravuogn Filisur sto sanar la chanalisaziun da Stugl, tenor in'emprima evaluaziun svanissan dus bigls. Cun ina petiziun duessan quests dus bigls da Stugl vegnir mantegnids.

Ralph Feiner, ch'ha inoltrà la petiziun per mantegnair ils bigls a Stugl, ha ditg envers RTR ch'el haja gia inoltrà in recurs cunter il project da simplamain laschar svanir il bigl sisum vischnanca. Ina plazza da catram enstagl na saja nagina opziun per in lieu da s'entupada. E cun sia petiziun vuless el far attent sin l'impurtanza sociala da bigls en vischnanca – quai sajan ils lieus da scuntrada. La petiziun ch'ha en paucs dis cuntanschì la finamira minimala da 50 suttascripziuns vuless sensibilisar la politica per talas dumondas. La petiziun n'è dentant betg valaivla di Luzi Schutz, il president communal da Bravuogn/Filisur. «La petiziun n'è betg inoltrada en scrit e betg d'ina persuna ch'abitescha en vischnanca», resumescha Schutz. Tuttina ins saja pront da discurrer surlonder.

audio
Petiziun per dus bigls a Stugl
ord Actualitad dals 09.03.2023. Maletg: RTR
laschar ir. Durada: 3 minutas 31 Secundas.

Sensibilisar per la problematica aua

Luzi Schutz è pertschert da l'emoziunalitad en general da bigls. Il lieu dal bigl che stuess davent saja exact en in lieu nua che camiuns da transport da laina hajan difficultads da passar. Il mument saja dentant er bun per sensibilisar la populaziun per la tematica aua. La vischnanca elavurescha il mument la lescha d'aua e per quest motiv hajan ins fatg mesiraziuns. Quellas mussan che per exempel a Stugl vegn duvrà cun ils bigls 18 giadas dapli aua l'onn che dals dus manaschis purils ed ils sis abitants. «Sche 18 millliuns liters aua culan tras ils bigls e la populaziun da la fracziun na dovra gnanc in milliun liters aua ad onn, lura n'è quai en nagina proporziun» resumescha Schutz. Ils ultims dus onns hajan plinavant mussà che l'aua vegnia adina pli pauca ed uschia er pli custaivla.

Luzi Schutz
Legenda: Luzi C. Schutz Il president communal da Bravugon/Filisur avant in dals bigls a Filisur RTR

Dar enavos la balla als petiziunaris

Per Luzi Schutz è il bigl er en connex cun la via da guaud en in lieu problematic. Ils camiuns na vegnan betg da passar bain quel. Il bigl haja exact er in effect da calmar il traffic argumentescha Feiner. Cun ina brev a Feiner ed il abitants da Stugl ha la vischnanca ussa envidà ils petiziunaris da far propostas concretas co schliar ils problems da bigls e la via a Stugl. Feiner ha confermà la brev ed è pront per discurs, la lavur da planisaziun saja dentant cleramain tar la vischnanca.

Der Brunnen auf in Stugl
Legenda: Il bigl da stgarpitsch sin la plazza duai restar tenor ils petiziunaris e las petiziunarias. RTR

Per Ralph Feiner, ch'ha sia chasa sper la plazza cun il bigl, èsi cler, la vischnanca da Bravogn Filisur vuless ir la via simpla cun laschar svanir il bigl sin la plazza a l'entschatta da Stugl. Per Luzi Schutz n'ha il bigl dentant nagina valur relevanta per il maletg da la vischnanca, er sche Stugl è en l'inventar da lieus cun maletg da lieu d'impurtanza naziunala. Ins saja en contact cun la tgira da monument, l'onn passà saja vegnì concedì il credit da 1,7 milliuns francs cunquai che la chanalisaziun da Stugl stoppia vegnir remplazzada. Il maletg dal lieu gudogna tenor Schutz en mintga cas, per exempel er cun metter lingias libras da telefon sut terra.

Anc temp in onn

Las lavurs duessan vegnir cumenzadas da primavaira en la part senza ils bigls. Quels vegnan ad esser part da l'etappa 2024 ha Schutz ditg vers RTR ed uschia saja el optimistic da chattar ina soluziun che cuntenta. Cuntent è il petiziunari Feiner dentant unicamain sch'il bigl resta.

Stugl
Legenda: Il bigl da Stugl ch'è en via RTR

RTR actualitad 17:00

Artitgels legids il pli savens