Suenter trais onns da pilot ha il Club alpin svizzer surpiglià la purschida - quai ensemen cun l'Associaziun traffic ed ambient VCS. Tant da Bivio sco da Silvaplauna partan ils bus da naiv per ir a far turas da skis e da gianellas en la regiun dal Güglia, sco il Club alpin svizzer CAS scriva.
En tut porscha il Club alpin svizzer otg trajects en Svizra. Duas lingias en la Val-de-Travers (Neuschatel), a Diemtigal (Berna), sin il Güglia (davenda Silvaplauna e Bivio) ed en la regiun da Sargans (Son Gagl). Ils bus a Binntal (Vallais) e Meiental (Uri) cumenzan pli tard en la stagiun.
Reducir il traffic
Il Club alpin svizzer ha decis da cuntinuar la purschida – quai ensemen cun l'Associaziun traffic ed ambient VCS. La fasa da pilot da trais onns haja mussà ch'i dettia in desideri per quella. Ils bus curseschan mo sin trajects ch'eran fin uss accessibels cun auto, dentant betg cun il traffic public.
L'intent da la purschida è da reducir il traffic entras privats en ils territoris. Cun la purschida regiunala possian ils sportists era far insatge per il clima durant lur turas.