L'ovra solara sur Sufers na vegn betg construida. Sco l'interpresa d'energia Alpiq communitgescha, hajan ils responsabels dal project decis ensemen cun la vischnanca da terminar il project. Malgrà ch'il Solarexpress saja vegnì prolungà, cuntinueschan las discussiuns davart ina limita per il sustegn. Il parlament decida per l'atun en chaussa. Questa decisiun haja grond'influenza sin la rentabilitad da projects futurs, scriva l'interpresa vinavant.
Per il project a Sufers na tanschia il temp alura betg pli per inoltrar ina dumonda da construcziun enfin la fin da l'onn. Quai fiss premissa per survegnir daners da sustegn. Ord quai motiv sajan ins vegnì a la conclusiun ch'il project na possia betg vegnir realisà a moda rentabla.
Il project avess previs circa 21'800 moduls solars sin ina surfatscha da 10 hectaras. Cun ina investiziun da 40 milliuns francs avess l'implant furnì forza electrica per circa 3'500 chasadas, cun ina producziun da 16GWh per onn. La vischnanca da Sufers aveva approvà il project la stad 2024.
Custs pli auts che previs
Pierre-Alain Herren, expert per energias regenerablas tar Alpiq, aveva ditg l'entschatta da l'onn ch’ins lavuria anc vi da las dumondas per ina lubientscha da bajegiar definitiva. Sfidas finanzialas pudessian però periclitar il project: ils custs da realisaziun èn pli auts che previs, ed ils pretschs d’electricitad actualmain bass mettan en dumonda la rentabilitad.
Organisaziun d'ambient sa anc memia pauc
Era dumondas ecologicas avevan chaschunà malsegirtads. La Pro Natura Grischun haja exprimì dubis e veglia spetgar il rapport ecologic avant ch'i dettia in'opiniun definitiva.
