Dus dals quatter posts en suprastanza vegnan elegids da nov ils 20 d'avust 2023. Adrian Ballat candidescha puspè e Giancarlo Torriani sa retira da l'executiva sin la fin da l'onn. Sper Adrian Ballat candideschan Thomas Eugen Metzler, Gregor Vellacher, Marco Jäger e Johann Buchli per in dals dus posts.
Sper ils dus posts da la suprastanza vegn era elegì in nov president communal. Là datti dentant mo in candidat. Las candidaturas ha la vischnanca communitgà il venderdi. Las vischnanca da Surses ha mintga dus onns elecziuns parzialas.
Be in candidat per il presidi communal
Sco sulet candidat per il presidi communal è s'annunzià Daniel Wasescha da Savognin. L'um da 49 onns lavura tar RTR en il sectur da las resursas umanas. El è maridà ed è bab da trais uffants.
La elecziun d’in nov president communal vegn necessaria, perquai ch’il president actual, Leo Thomann, na stat betg pli a disposiziun per ina ulteriura perioda d’uffizi. Thomann ch'ha 66 onns è dapi la fusiun da la vischnanca Surses l'onn 2016 president communal.
Per chattar persunas che candideschan per las elecziuns dals 20 d'avust è vegnida incaricada ina cumissiun. La tschertga è sa mussada fitg difficila, bleras persunas hajan refusà la dumonda da la cumissiun da candidar or da motivs professiunals u persunals.
Discussiun da podium a Savognin
Ad ina discussiun da podium la mesemna saira han tut ils candidats pudì sa preschentar e dir nua ch’els vulan metter il focus en l’avegnir. Radund 120 persunas èn vegnidas.
Sco quai che Gregor Vellacher, il manader dals runals da Beiva e Marco Jäger, anteriur president communal da Sur han ditg, saja impurtant ch’i saja era en l’avegnir represchentada la part sura da Surses, il Surgôt en la suprastanza da Surses. Ils candidats Thomas Metzler e Johann Buchli da Cunter vulan far puncts tar las elecziuns cun lur experientscha da professiun. Adrian Ballat da Savognin è il sulet candidat che vul vegnir reelegì, ils auter èn tuts candidats novs.
Il sulet candidat per il presidi Daniel Wasescha ha ditg, ch’el saja adina stà interessà quai che curria e passia en il Surses. Sco gronda sfida vesia el la mancanza da spezialistas e spezialists, che saja dapertut in grond tema. Crescher saja impurtant, ma quai possia mo grategiar sch’ins na dovria betg dapli persunal. Visiuns n’ha el betg numnà, el veglia plitost sa tegnair vi dal maletg directiv «Surses» 2030.
Introducziun da l'«elecziun taciturna»
Per l'elecziun da las instanzas communalas vegn da nov introducida l'elecziun «taciturna» u per tudestg «stille Wahl». Vul dir sch'i na dat betg dapli candidats e candidatas che posts, lura vegn questa persuna automaticamain elegida. Quai vala dentant mo per segunds scrutinis e tar elecziuns cumplementaras. Tar l'emprima elecziun ston ins vinavant ir a l'urna. Questa revisiun parziala da la lescha da votaziuns e d'elecziuns ch'è vegnida approvada da la radunanza communala na vala dentant betg per ils posts da presidi e da suprastanza.
Sco la vischnanca scriva vulan ins cun questa elecziun «taciturna» spargnar custs e lavur administrativa ed il medem mument cumbatter il fatg che la glieud va adina pli pauc savens a votar ed eleger cun evitar scrutinis nunnecessaris per elecziuns betg dispitaivlas.
Fitg bun quint 2022
A chaschun da la radunanza communala ha la populaziun da Surses er approvà il quint annual 2022. Quel serra tar entradas da 40 milliuns cun in surpli da prest quatter milliuns francs.
Credit per sanar il provediment d'aua a Savognin
Ultra da quai ha la radunanza communala approvà in credit da 360'000 francs per sanar il provediment d'aua Pro dal Sot a Savognin. Uschia vegnian ademplidas las pretensiuns da qualitad dumandadas da l'Uffizi chantunal per la segirtad da victualias e per la sanadad d'animals.
