La crappa – radund in meter cubic material – saja sa distatgada da la zona crappa da Lauas, ha confermà Andri Largiadèr, spezialist da privels da natira dal chantun. Ina visita al lieu haja mussà, ch’i saja il mument betg da quintar cun in privel acut per ulteriura crudada da crappa. Cun quai che la chasa pertutgada sa chattia en ina zona cotschna, saja qua però adina da quintar cun crudada da crappa. Ina evacuaziun da la zona abitada da Surava na saja però il mument nagin tema.
Mesiras duessan vegnir realisadas quest onn
Il 2021 aveva la radunanza communala da la vischnanca Albula/Alvra decidì in credit da radund dus milliuns francs, per realisar tailas e dus rempars cunter la Crappa da Lauas. Sco quai che Daniel Albertin, il president communal ha ditg sin dumonda, ins veglia anc quest onn realisar il project.
