15 onns stueva Surava desister d'ina butia. Cun il nov container dal Spar datti uss puspè nutriment pachetà, bavrondas, artitgels d'igiena ed ina schelta da products frestgs sco fritga, verdura, paun, products da latg e charn. Era products regiunals dal Puracenter a Lai che segna per il manaschi dal container, porscha la butia a Surava.
La butia digitala funcziuna suandantamain:
Cun in code da QR sa registreschan ins a l’entrada. Lura s'avra la porta ed ins po cumprar en. Ils artitgels vegnan scannads cun il telefonin. A la fin ins po pajar a moda digitala cun l’atgna carta da credit u Twint. Per garantir in manaschi segir ed evitar enguladitschs, èn installadas diversas cameras.
Bilantscha intermediara è buna
Il container a Surava è il segund container dal Spar en il Grischun. L'emprim datti dapi il mars a Rueras en Surselva. Sco quai che Fredy Caminada, il manader dal Spar da Mustér e dal container da Rueras ha ditg, hajan ins fatg bunas experientschas fin uss. «I dat dis ch’èn megliers e tscherts èn pli schlets, ma nus faschain ina bilantscha intermediara positiva». Ins vegnia a persequitar vinavant ils affars da stad ed ins saja mirveglius sin ils affars da l’enviern.
La primavaira da l'onn proxim vegn fatg ina bilantscha definitiva e guardà co e sch’il container haja in futur. Il mument na possian ins anc betg dir, sch’ins possia scriver cifras nairas sur l’entir onn, uschia Caminada.