Ils 29 da matg ha la Regenza grischuna decidì da sclauder l'interpresa da construcziun KIBAG per quatter onns da tut las lavurs publicas dal chantun Grischun. Encunter questa decisiun ha la KIBAG fatg recurs tar la Dretgira administrativa dal Grischun. La dretgira ha sinaquai relaschà ina disposiziun superprovisorica che di – ch'il cantun na dastga il mument betg sclauder la KIBAG da lavurs dal chantun.
Las renfatschas da la KIBAG
Il chantun emprovia da retardar surdadas da lavurs – u ch’el tschertgia auters motivs per betg surdar las lavurs a la KIBAG. Quai ha ditg a RTR Jann Ruckstuhl, il mainafatschenta da KIBAG per il Grischun. Cun la disposiziun da la Dretgira administrativa quinta el da survegnir las lavurs da cuvrida sin il traject tranter Parpan e Valbella. Là aveva la KIBAG inoltrà la pli favuraivla offerta, e stuess tenor lescha da submissiun vegnir resguardada per la lavur.
Procedura pendenta
Il chantun na prenda il mument betg posiziun, damai ch'il cas saja pendent avant Dretgira administrativa. Ina sentenzia vegn spetgada en il decurs dal fanadur. Sin fundament da la situaziun actuala ha la firma KIBAG dentant gia instradà ina ulteriura procedura. Ella ha denunzià il chantun Grischun tar la WEKO.