La radunanza communala da Surses ha approvà – cun 282 vusch Gea envers 5 vuschs Na – in credit d‘impegn da 8,9 milliuns francs per cumprar l'hotel Cube a Savognin, inclusiv il bajetg daspera cun l’affar da sport. Inclus en questa summa èn il terren sco era las lavurs da renovar e mobigliar da nov l'hotel. Sco proxim va la fatschenta a l‘urna, la votaziun ha lieu ils 29 da mars. En cas ch'i dettia là in Na, giess l’hotel concurs l’avrigl, ha communitgà la vischnanca da Surses.
Il Cube, ch‘è anc en possess da l‘interprendider austriac Rudolf Tucek, era vegnì avert il 2005 ed è stà serrà dapi il 2022. Plirs onns è la vischnanca stada a la tschertga d'ina soluziun. E tut tenor il resultat a l'urna pudess el bainbaud pia puspè giugar ina rolla en la cuntrada turistica regiunala. Cun la cumpra da l'hotel spera la vischnanca da Surses da pudair dar nova vita a quel grazia a 282 novs letgs. En il bajetg daspera duai dar ina plazza per in affar da sport e chombras da persunal. Quai aveva la suprastanza decis il schaner en collavuraziun cun la Pendicularas Savognin SA e la Turissem Val Surses Savognin Bivio SA.
Uniun Albierts da giuventetgna procura per manaschi
I n’è betg planisà che la vischnanca mainia in dals manaschis, mabain che l'uniun Albierts da giuventetgna svizzers gestiuneschia il manaschi. Lezza era gia avant l'avertura dal Cube il 2005 interessada vid in local per in albiert da giuventetgna a Savognin e vul gia dapi onns avrir sia 53avla localitad. Ussa duai quai funcziunar cun in contract che vala per ina giada 10 onns. Persuenter paja la vischnanca ina contribuziun da manaschi che quai cuvrir las expensas administrativas. Era las investiziuns ed amortisaziuns restan tar la vischnanca.
Locataris privats gia interessads
Ed il bajetg daspera vul la vischnanca surdar ad in locatari extern. Tenor il messadi da votaziun sajan interessents gia s'annunziads. Uschia duai l’infrastructura sin l’areal Lecsch vegnir mantegnida e l’attractivitad turistica vegnir augmentada.
Gratuit n'è nagut, uschia che la vischnanca quinta cun il pretsch da cumpra da 5 milliuns francs ed ulteriurs 3,7 milliuns francs per mantegniment ed investiziuns. Ensemen cun ina reserva da 0,2 milliuns francs dumonda la vischnanca pia in credit d'emprest da total 8,9 milliuns francs. Ed ina giada che las amortisaziuns èn fatgas, quinta la vischnanca cun in surpli d'entradas dal manaschi da l'albiert da giuventetgna e dal locatari en il bajetg daspera. Tenor il messadi quinta la vischnanca numnadamain cun cifras nairas, uscheditg che l'albiert è occupà per 27,3% – quai che munta 20'000 pernottaziuns.
Ils proxims pass
Tenor il messadi da votaziun è il plan da termins fitg stretg, perquai che la transacziun è pussaivla mo enfin la fin da mars. Quai pervi da la vendidra che ristga uschiglio dad ir concurs:
- Ils 23 da favrer 2026 decida la radunanza communala en chaussa.
- La fatschenta va ils 29 da mars 2026 a l'urna.
- Vegn la fatschenta approvada a l'urna suttascriva la vischnanca avant la fin mars ils contracts.
- L'entschatta december duai l'hotel Cube puspè avrir sias portas.
Tge ch'è capità
- Avert sias portas ha l'hotel Cube il december 2005. L'atun 2018 è quel vegnì serrà per l'emprima giada. L'entschatta schaner 2020 han ins avert l'hotel per curt e lura serrà el definitivamain enfin oz.
- Iniziant, possessur e l'investur austriac Rudolf Tucek ha adina puspè chaschunà lingias grassas en connex cun l'hotel pervi da daivets e dispitas e pajas da persunal betg pajadas.
- Las mesiras spetgadas da la dretgira regiunala Alvra sajan vegnidas liquidadas, uschia che la Societad S1 Hotelerrichtungs AG è puspè giuridicamain capabla d'agir per l'hotel Cube.
- La societad S1 Hotelerrichtungs AG era s'inscuntrada davant la dretgira regiunala d'Alvra cun las pendicularas per sclerir dumondas avertas che pertutgan pretensiuns da raps e fittaziun.
Rudolf Tucek è dapi la fin dals onns 1970 activ en la branscha da turissem. El ha gì ed ha divers posts en firmas ed organisaziuns turisticas da l'Austria, p. ex. è el stà CEO e directur da la Vienna International Hotelmanagement AG cun manaschis d'hotellaria en differents pajais.
Tenor atgnas indicaziuns è el dapi il 2004 sviluppader dal concept da Cube. Quai èn hotels sco quel a Savognin cun ina purschida e structura innovativa ed attractiva cunzunt per in public giuven (sco p. ex. cun ina paraid da raiver u ina zona da gieus e divertiment entaifer l'hotel).
Adina puspè pon ins però era leger en artitgels da differentas opiniuns u dispitas enturn el e ses posts.
Perquai che Rudolf Tucek n'ha dapi onns betg pli organisà radunanzas generalas per s'occupar cun ils problems da l'hotel, ha la finala era la dretgira regiunala d'Albula/Alvra stuì intervegnir. La dretgira aveva pretendì che la societad d'aczias da l'hotel resolva divers puncts – uschiglio spetgia la liquidaziun. Las mesiras spetgadas sajan vegnidas liquidadas, aveva l'anteriur president da la dretgira regiunala Alvra ditg sin dumonda da RTR. En il fratemp ha la S1 Hotelerreichtungs AG midà sia dimora a Cuira, uschia che per eventuals cas giuridics è responsabla la dretgira regiunala Plessur.
Or da l'archiv
Il 2005 è l'hotel Cube vegnì construì cun in nov concept cunzunt per la clientella giuvna. Il 2018 èn las portas lura sa serradas per l'emprima giada pervi da daivets ed ina dispita giuridica cun las pendicularas.
La fin il 2018
Il 2020 lura la reavertura sco hotel da garni. Ed il 2022 lura la communicaziun ch'ins na possia betg cuntinuar cun il manaschi pervi da la pandemia da corona – fin tar il cas da dretgira il 2024.
